ကာကွယ်ဆေးထိုးတိုင်း ဘီပိုးမအောင်

အသည်းရောင်အသားဝါဘီပိုးဟာ မြန်မာနိုင်ငံမှာ အဖြစ်များပါတယ်။ဒါ့ကြောင့် လူတိုင်းနီးပါးလည်း ကာကွယ်ဆေး ထိုးထားဖို့လိုပါတယ်။ အလားတူ ဆေးထိုးပြီးရင်လည်း အောင်၊မအောင် ပြန်လည် စစ်ဆေးဖို့လိုအပ်တာ မမေ့အပ်ဘူး။  ကျွန်တော်တို့တိုင်းပြည်မှာ အသည်းဘီပိုးကာကွယ်ဆေးကို ထိုးတတ်ကြတယ်။ ပြဿနာ တခုက ဆေးထိုးသူအများစုဟာ ဆေးအောင်၊ မအောင် ပြန်လည်မစစ်ဆေးကြတော့ဘူး။ အမှန်ကတော့ ဆေးထိုးပြီးတဲ့အခါ ပြန်လည်စစ်ဆေးဖို့ လိုအပ်ပါတယ်။ ဘီပိုး ကာကွယ်ဆေးသုံးကြိမ် ထိုးပြီး ၁လခွဲကြာတဲ့ အခါ ဆေးအောင်၊မအောင်(HBs Ab quantitive)စစ်ဖို့ လိုအပ်ပါတယ်။ 

ဘီပိုး ကာကွယ်ဆေးထိုးခြင်း

အသည်းရောင်ဘီပိုးကာကွယ်ဆေးဆိုတာ အမှန်တော့ ပိုးရဲ့အပြင်ဖက် အခွံ(HBs Ag)ကို ခန္ဓာကိုယ်ခုခံအားရှိရုံလောက် ထိုးထည့်ပေးတာ ဖြစ်ပါတယ်။ ဆေးကို လက်မောင်းမှာ အသားဆေးထိုးပေးရတယ်။ပုံမှန်အားဖြင့် ၀-၁လ-၆လစသည်ဖြင့် သုံးကြိမ် ထိုးပေးရတယ်။ ၀-၁လ-၂လ-၁၂လ လေးကြိမ်ထိုးတဲ့နည်းလည်း ရှိသေးတယ်။ အများစုဟာ သုံးကြိမ်ထိုးနည်းကိုသာ အသုံးပြုကြတယ်။ ပထမအကြိမ်နဲ့ ဒုတိယအကြိမ်ကို ၂လအတွင်း ထိုးပေးရမယ်။ ဒုတိယနဲ့ တတိယကြား အနည်းဆုံး ၂လ(၈ပတ်ခြား)ပြီး ထိုးပေးရတယ်။ ဒါ့ကြောင့် ပထမနဲ့ တတိယအကြိမ်ကြားမှာ အနည်းဆုံး ၄လ(၁၆ပတ်)ခြားသင့်တယ်။ 

အရေးကြီးတဲ့ သွေးစစ်ချက်

ဆေးထိုးပြီးတဲ့အခါ ဆေးအောင်၊မအောင်ဆိုတာကို တတိယမြောက်ဆေးထိုးပြီး ၁လမှ ၂လအတွင်း ပြန်စစ်ပေးရတယ်။ စစ်တဲ့အခါ HBs Agကိုတိုက်ဖျက်နိုင်တဲ့ anti-HBs Ab(quantitive) ပမာဏကို စစ်ပေးရတယ်။ အကယ်၍ HBs Abက 10mIU/ml အနည်းဆုံးရှိရင် ဆေးအောင်တယ်သတ်မှတ်တယ်။ HBs Ab(+)လို့လည်း ပြတယ်။ အကယ်၍ HBs Ab titerက <10mIU/mlဆိုရင် မအောင်သေးဘူးလို့ သတ်မှတ်ပါတယ်။ နောက်တခါထပ်ပြီး ဆေးသုံးကြိမ်(၀-၁-၆) ပြန်ထိုးရမယ်။ ဒုတိယတကျော့ ဆေးသုံးကြိမ်လုံးထိုးပြီးနောက် ၁လခွဲအကြာမှာ နောက်ထပ် ဆေးအောင်၊မအောင် ထပ်စစ်ပါတယ်။ ဒီတခါစမ်းကြည့်လို့ 10mIU/ml အနည်းဆုံးရှိရင် ဆေးအောင်တယ်သတ်မှတ်ပါမယ်။ အကယ်၍ ဒုတိယအကျော့(သုံးကြိမ်)ထိုးပြီး ဆေးမအောင်သေးရင်(တနည်းအားဖြင့် HBs Ab <10mIU/mlဖြစ်ရင်) တခြားသွေးစစ်ရပါမယ်။ စစ်တဲ့အခါ HBs Agနဲ့ HBc Abကို သွေးစစ်ကြည့်ရတယ်။ အဖြေရလာရင် ဖြစ်နိုင်ချေ သုံးခုရှိတယ်။

၁။ကာကွယ်ဆေး မတိုးသူ၊မတုံ့ပြန်သူ(Non-responder)

သွေးစစ်တဲ့အခါ အဖြေနှစ်ခုလုံး negative(HBs Ag(-)ve နဲ့ HBc Ab(-)ve) အနုတ်ပြနေရင် ကာကွယ်ဆေးကိုမတုံ့ပြန်သူ(non-responder)အဖြစ် သတ်မှတ်ပါတယ်။ ကာကွယ်ဆေးပေးလည်း မထူးသူ၊မတုံ့ပြန်သူဖြစ်လို့ ကာကွယ်ဆေး ထပ်ပေးစရာ မလိုတော့ဘူး။ ရောဂါဝင်ရောက်မလာအောင် ကာကွယ်ရုံသာ အားစိုက်ရတယ်။ အကယ်၍ ဒီလိုလူမျိုးမှာ ဘီပိုးရှိတယ်လို့ ယူဆရတဲ့ အရည်၊သွေး၊အကျွဲအချွဲတွေနဲ့ မတော်တဆထိခိုက်ရှနာမိရင် လိုအပ်တာကို ချက်ချင်း လုပ်ဆောင်ရပါတယ်။ အရင်ဆုံး Hepatitis B Immunoglobulin(HB Ig)ဖြေဆေးကို ချက်ချင်း ထိုးပေးရတယ်။ ပြီးရင် နောက်တစ်လကြာတဲ့အခါ HB Igကို နောက်ထပ်တလုံး ထပ်ထိုးပေးရမယ်။ ဆေးထိုးတဲ့အခါ ကာကွယ်ဆေးထိုးသလိုပဲ လက်မောင်းရင်းမှာ အသားဆေးထိုးပေးရတယ်။ ဆေးပမာဏကို အလေးချိန်နဲ့ချိန်ပြီး(0.06ml/kg) ထိုးပေးရတယ်။

၂။ကာကွယ်ဆေးထိုးဖို့မလိုအပ်တော့သူ

ဆေးစစ်ကြည့်တဲ့အခါ သွေးအဖြေအရ HBs Ag(-)ဖြစ်ပြီး HBc Ab(+)ဆိုရင် အရင်က ရောဂါပိုးဝင်ဘူးတယ်လို့ သိရတယ်။ဒီလို လူနာမျိုးမှာ ကာကွယ်ဆေးထိုးစရာ မလိုအပ်တော့ပါဘူး။ ဆေးအောင်တယ်လို့ သတ်မှတ်လိုက်ပါတယ်။ ရောဂါပိုးကို တိုက်ဖျက်နိုင်စွမ်း ခုခံအားရှိနေတာ ဖြစ်လို့ ဆေးကုစရာ မလိုအပ်တော့ပါဘူး။ ရောဂါပြီးသူအဖြစ် သတ်မှတ်ပါတယ်။

၃။ရောဂါပိုးဝင်ရောက်ပြီး လတ်တလောရောဂါရှိနေသူ

အကယ်၍ သွေးအဖြေနှစ်ခုလုံး(+)ဆိုရင် တနည်းအားဖြင့် (HBs Ag(+)ve နဲ့ HBc Ab(+)ve)ဖြစ်နေရင် လတ်တလော ပိုးရှိနေပြီ ဖြစ်လို့ ကာကွယ်ဆေးထိုးဖို့ မလိုအပ်တော့ပါဘူး။ တခြားသူကို ရောဂါပိုးမကူးစက်အောင် ဂရုစိုက်ဖို့ မှာကြားရတယ်။ ဒါ့ပြင် ကိုယ်တိုင်လည်း အသည်းရောင်ဘီပိုးရှိလို့ ဆရာဝန်နဲ့ပြသပြီး သေချာဂရုစိုက် ကုသသင့်ပါတယ်။

HBs Abဆိုတာ အချိန်ကြာတာနဲ့အမျှကျဆင်းတတ်တာထုံးစံပါ။ အကယ်၍ ဆေးသုံးကြိမ်ထိုးပြီး ဆေးအောင်ထားရင် 10mIU အောက်ကျတောင်မှ သိပ်ဆိုးရိမ်ဖို့မလိုအပ်တော့ဘူး။ သီအိုရီအရ ပထမသုံးကြိမ်ကာကွယ်ဆေးထိုးပြီး ဆေးအောင်ရင်(HBs Ab -at least 10mIU) HBV အသည်းရောင်ဘီ မဖြစ်အောင် ၂၂နှစ်လောက် ကာကွယ်ပေးနိုင်တယ်။ ကြားထဲမှာ သွေးစစ်ကြည့်လို့ HBsAb(-) ပြရင်တောင် ကာကွယ်ဆေးဆက်ထိုးဖို့ မလိုအပ်တော့ဘူး။ ဘာ့ကြောင့်လဲဆိုတော့ ခန္ဓာကိုယ်မှာရှိတဲ့ ခုခံအားမှတ်ဥာဏ် immune memory (anamnestic anti-HBs response)ကျန်ရစ်ခဲ့လို့ ဖြစ်ပါတယ်။ အလားတူ ခုခံအားကျဆင်းတဲ့ လူနာတွေမှာလည်း ဆေးအောင်ပြီးဖြစ်ရင် ကာကွယ်ဆေး ထပ်ထိုးဖို့မလိုအပ်ပါဘူး။ ဒါကသီအိုရီအရပြောတာ ဖြစ်ပါတယ်။ တချို့က (၅)နှစ်နေတဲ့အခါ booster dose တကြိမ်ပြန်ထိုးဖို့ လိုအပ်တယ်လို့ ယူဆကြတယ်။

ဆေးအောင်၊မအောင် စစ်မထားရင် ဘယ်လိုလုပ်သင့်လဲ။

ဆေးအောင်၊မအောင် ပြန်စစ်မထားတဲ့အခါ ပိုးရှိသူကတဆင့် ကူးစက်ခံရတတ်တယ်။သို့သော် သွေးစစ်ပြီး HBs Abပမာဏ အနည်းဆုံး 10mIU ရှိရင် ဘာမှထပ်လုပ်ဖို့မလိုအပ်တော့ပါဘူး။ ရောဂါပြီးနေသူလို့ သတ်မှတ်ပါတယ်။

အကယ်၍ ရောဂါပိုးကူးစက်ခြင်းခံရတယ်လို့ သံသယရှိရင် အင်တီဘော်ဒီစစ်ကြည့်ရတယ်။ HBs Ab <10mIU အောက်ဆိုရင် HBIg ဖြေဆေး ချက်ချင်း ထိုးဖို့ လိုအပ်ပါတယ်။ တခါတည်း နောက်လက်မောင်းမှာ အသည်းရောင်ဘီ ကာကွယ်ဆေးကို booster dose အနေနဲ့ တလုံးထိုးပေးရမယ်။ နောက် ၆လအကြာမှာ HBs Abထပ်စစ်ပေးရမယ်။ ထိုးထားတဲ့  IGက အင်တီဘော်ဒီတိုက်ရိုက် ဖြစ်တာမို့ သွေးအဖြေကို အနည်းဆုံး ၄-၆လကြာမှ ပြန်စစ်ရတာဖြစ်ပါတယ်။

ကာကွယ်ဆေးထိုးတဲ့အခါ ဆရာဝန်တွေ လိုက်နာသင့်တာတွေလည်း ရှိပါတယ်။ ကာကွယ်ဆေး ထိုးထားတဲ့အချက်အလက်တွေကို စနစ်တကျမှတ်တမ်း တင်ထားသင့်တယ်။ 

-လူနာအမည်(name)၊

-ဆေးနာမည်(drug)

-ထုတ်လုပ်တဲ့ ကုမ္ပဏီ(manufacturer)

-ဆေးအမှတ်(vaccine lot)

-ရက်စွဲ(date) 

-ထိုးတဲ့နေရာ(route)

-ဆေးပမာဏ(vaccine dosages)

ကာကွယ်ဆေးထိုးပြီးတဲ့အခါလည်း recordလုပ်ပြီး သေချာမှတ်တမ်းတင်သင့်တယ်။

-လူနာအခြေအနေ၊

-သွေးပြန်စစ်တဲ့နေ့၊

-ဆေးအောင်၊မအောင် ဆိုတာကို သေချာမှတ်ထား၊ရေးထားသင့်တယ်။ ဘာ့ကြောင့်လည်းဆိုတော့ သွေးပြန်စစ်တဲ့အဖြေက နောက်ပိုင်းအတွက် အရေးကြီးလို့ ဖြစ်ပါတယ်။

သိစရာအချက်များ

အသည်းရောင် အသားဝါဘီ ကာကွယ်ဆေးဆိုတာ ဗိုင်းရပ်စ်ပိုးမဟုတ်ပဲ HBs Ag(ပိုးအခွံ)ကို ထိုးတာ ဖြစ်လို့ ဘေးထွက်ဆိုးကျိုး ပြဿနာကြီးကြီးမားမားမရှိပါဘူး။ ဒါ့ကြောင့် ကိုယ်ဝန်ဆောင်စဉ်နဲ့ နို့တိုက်စဉ် လိုအပ်တဲ့အခါ ထိုးပေးနိုင်တယ်။ မိခင်တွေအနေနဲ့ မိမိတို့ကလေးကိုစိတ်ချလက်ချ နို့တိုက်နိုင်တယ်။HBsAg(+) မဟုတ်မချင်း ဘယ်လိုအခြေအနေမျိုးမှာမဆို ကာကွယ်ဆေးထိုးပေးနိုင်တယ်။ ကာကွယ်ပြီးသားလည်း ကာကွယ်ဆေးထပ်ထိုးမိလို့ ဘာပြဿနာမှမရှိနိုင်ပါ။ ခုခံအားကျဆင်းသူတွေမှာ လိုအပ်ရင် ထိုးထားနိုင်တယ်။ သွေးပြန်စစ်ကြည့်ပြီး ၁၀အောက်နည်းရင် booster dose ထပ်ပေးနိုင်တယ်။ ဆေးအောင်သွားရင် အင်တီဘော်ဒီပမာဏက သိပ်အရေးမပါတော့ဘူး။  မြန်မာနိုင်ငံမှာတော့ ဆရာဝန်အများစုက HBs Ab စစ်ပြီး 100mIUအထက်ဖြစ်မှ ဆေးအောင်တယ်လို့ သတ်မှတ်ထားတယ်။ အကယ်၍ 100mIUအောက်ဆိုရင် low responder အဖြစ်သတ်မှတ်ပြီး ကာကွယ်ဆေးထပ်ထိုးခိုင်းပါတယ်။ အထူးသတိရစေချင်တာက ကာကွယ်ဆေးသုံးကြိမ် ထိုးပြီးတိုင်း ဘီပိုးအောင်၊မအောင် သေချာပေါက် ပြန်စစ်ပေးပါ။ အကယ်၍ မအောင်သေးရင် ဆရာဝန်ညွှန်ကြားချက်အတိုင်း ကာကွယ်ဆေးထပ်ထိုးဖို့ လိုအပ်ပါတယ်။

ဒေါက်တာ အေးမင်းထူး

ရတနာပုံသတင်းစာ(၂၃.၆.၁၄)