သက်စောင့်ဓာတ်များကို လေ့လာခြင်း(၉)

Vitamin B12(cobalamin)

ဗီတာမင် အုပ်စုဝင်တွေထဲမှာ အရှုပ်ထွေးဆုံး တည်ဆောက်ပုံရှိတဲ့ ဗီတာမင်တမျိုး ဖြစ်ပါတယ်။ ဖွဲ့စည်းပုံပေါ်မူတည်ပြီး နာမည်အမျိုးမျိုး ရှိပါတယ်။ cobalamin, cobamin,vitadurin, cyanocobalamin,hydroxycobalamin, methylcobalamin, adenosylcobalamin စသည်ဖြင့် အမျိုးမျိုး ရှိပါတယ်။ ဗီတာမင် ဘီတွဲကို လူ၊တိရိစ္ဆာန်နဲ့ အပင်တွေက မထုတ်လုပ်နိုင်ကြဘူး။ ဗက်တီးရီးယားပိုးတွေ ကတဆင့် ရရှိကြတယ်။ ဗက်တီးရီးယားတွေရဲ့ fermentationဖြစ်စဉ်ကတဆင့် hydroxycobalamin ကို ရရှိနိုင်တယ်။ ဓာတ်ခွဲခန်းတွေမှာ activated charcoalနဲ့ ထပ်မံသန့်စင်ပြီး cyanocobalaminကို ထုတ်ယူတယ်။ လူ့ခန္ဓာကိုယ်ထဲရောက်ရင် methylcobalamin ဆိုပြီး ပြောင်းလဲသွားတယ်။ အသည်းထဲမှာ adenosylcobalamin ဆိုပြီး သိမ်းဆည်းပြန်တယ်။ လိုအပ်တဲ့ အခါ သိမ်းဆည်းထားတဲ့ vitamin B12ကို ထုတ်ယူသုံးစွဲပေးတယ်။ 

ဗီတာမင် ဘီတွဲကို pernicious anaemia သွေးအားနည်းရောဂါနဲ့ ဆက်စပ်ပြီး စတင် တွေ့ရှိခဲ့ပါတယ်။ သွေးနီဥဖွဲ့စည်းဖို့ အရေးပါသလို ဦးနှောက်နဲ့ အာရုံကြောဆဲလ်တွေအတွက်လည်း လိုအပ်ပါတယ်။ ခန္ဓာကိုယ်အတွက် လိုအပ်တဲ့ ဆဲလ်သစ်တွေကို အစားထိုးပေးတယ်။ ပျက်ဆီးသွားတဲ့ ဒီအန်အေကို ပြုပြင်ပေးတယ်။ ဗီတာမင်ဘီ အုပ်စုဝင်ဖြစ်လို့ အစားအသောက်၊အာဟာရကနေ စွမ်းအင်ထုတ်လုပ်ဖို့ ပါဝင်ကူညီပေးတယ်။ 

Vitamin B12ကို အသား၊အသည်း၊နို့၊ကြက်ဥကနေ အဓိကရရှိတယ်။ အသားရှောင်သူတွေမှာ နို့၊ကြက်ဥ၊ဒိန်ချဉ်ပေးပြီး ပြန်ဖြည့်ရတယ်။ အသီးအရွက်တွေထဲမှာ မတွေ့ရဘူး။ အစားအသောက်မှာပါဝင်တဲ့ ဗီတာမင်ဘီတွဲကို ခန္ဓာကိုယ်က စုပ်ယူနိုင်ဖို့ အစာလမ်းကြောင်းက အရေးပါတယ်။ အစာအ်ိမ်က ထွက်လာတဲ့ hydrochloric acidက အစာချေဖျက်မှုကို အားပေးတယ်။ အသားမှာ ပါဝင်တဲ့ ဘီတွဲဓာတ်နဲ့ ပရိုတင်းဓာတ်ကို ခွဲခြားပေးတယ်။ ပြီးရင် အစာအိမ်ရဲ့ parietal cellက ထွက်လာတဲ့ intrinsic factorနဲ့ပေါင်းစပ်ရပါတယ်။ ပေါင်းစပ်ပြီးနောက်မှာ အူသိမ်နှောင်းပိုင်းကတဆင့် ခန္ဓာကိုယ်က စုပ်ယူပါတယ်။ အကယ်၍ အစာအိမ်ကထွက်လာတဲ့ intrinsic factor ဆိုတာမရှိရင် ခန္ဓာကိုယ်က ဘီတွဲကို မစုပ်ယူနိုင်တော့ဘူး။ ဒီလိုအခါမျိုးမှာ ဘီတွဲချို့တဲ့ပြီး pernicious anaemia သွေးအားနည်းရောဂါ ဖြစ်လာနိုင်တယ်။ 

အသုံးဝင်ပုံ

ဘီတွဲရဲ့ အသုံးဝင်ပုံကများတယ်။သွေးအားနည်း ရောဂါကို ကာကွယ်ဖို့နဲ့ ကုသဖို့ အသုံးပြုတယ်။ နှလုံးရောဂါ၊ဆီးချိုရောဂါနဲ့ အဆစ်အမြစ်ရောဂါအတွက် အသုံးပြုကြတယ်။ နှလုံးအတွက် မကောင်းတဲ့ သွေးတွင်း homocysteine levelကို လည်း ကျဆင်းစေတယ်။ မှတ်ဥာဏ်ချို့ယွင်းခြင်းနဲ့ အယ်လ်ဇိုင်းမားရောဂါဖြစ်ပွားမှုကို ကာကွယ်ပေးတယ်။ အဆုတ်ကင်ဆာ၊ရင်သားကင်ဆာ၊သားအိမ်ခေါင်းကင်ဆာ တွေမှာ အကျိုးရှိနိုင်တာ တွေ့ရတယ်။ ခရုသင်း၊နှင်းခူနာလို အရေပြားရောဂါ အချို့အတွက်လည်း အသုံးကျတယ်။ 

နေ့စဉ်လိုအပ်ချက်

အသက်အရွယ်လိုက်ပြီး ဘီတွဲလိုအပ်ချက်တွေ မတူညီကြဘူး။ မွေးကင်းစမှ ၆လထိ 0.4mcg၊၆လ-၁နှစ်ထိ 0.5mcg၊၁-၃နှစ်ထိ 0.9mcg၊ ၃-၈နှစ်ထိ 1.2mcg၊၈-၁၃နှစ်ထိ 1.8mcg၊၁၃နှစ်အထက် 2.4mcg၊ကိုယ်ဝန်ဆောင်မိခင်မှာ 2.6mcg၊နို့တိုက်မိခင်တွေမှာ 2.8mcg အသီးသီးလိုအပ်ပါတယ်။ 

လေ့လာမှုတွေအရ လူဦးရေရဲ့ ၁.၅-၁၅ရာခိုင်နှုန်းဟာ ဘီတွဲလုံလောက်မှုမရှိကြဘူး။ စုပ်ယူမှု အားနည်းချက်ကြောင့် ဖြစ်နိုင်တယ်။ အသက်အရွယ်ကြီးရင့်သူ(သို့) အသက်(၅၀)ကျော်အရွယ်မှာ ၂၀ရာခိုင်နှုန်းဟာ ဘီတွဲချို့တဲ့ကြတယ်။ ဒါ့ပြင် အသားမစားသူ၊သက်သက်လွတ်သမား၊ဆီးချိုသမားတွေဟာ ဘီတွဲချို့တဲ့နိုင်သူတွေ ဖြစ်ကြတယ်။ အရက်သောက်သူ၊အူလမ်းကြောင်းရောဂါရှိသူတွေမှာ ပိုချို့တဲ့နိုင်တာ တွေ့ရတယ်။ သောက်ဆေးတွေကြောင့်လည်း စုပ်ယူမှုကို ထိခိုက်နိုင်တယ်။ ဥပမာ metformin,chloramphenicol, colchicine စတာတွေနဲ့ တွဲမသောက်သင့်ဘူး။ proton pump inhibitor, H2 blocker အစာအိမ်ဆေးတွေကလည်း ဘီတွဲစုပ်ယူမှုကို ထိခိုက်စေတယ်။

ဘီတွဲချို့တဲ့လက္ခဏာတွေ

ဘီတွဲချို့တဲ့ခြင်းကြောင့် အားယုတ်တာ၊နုံးချိတာ၊မောလွယ်ပန်းလွယ် ဖြစ်လာတယ်။ အစားအသောက်ပျက်၊ပါးစပ်ပျက်ပြီး ပိန်လာတယ်။ ဝမ်းချုပ်နိုင်တယ်။ လမ်းလျှောက်ရင် ထုံကျင်၊ကိုက်ခဲဖြစ်လာတယ်။ အာရုံကြောထိခိုက်သူတွေမှာ ခြေလက် ထုံတာ၊ကျဉ်တာ ရှိတယ်။ အပ်နဲ့ထိုးသလို တစစ်စစ်၊စပ်ဖျဉ်းဖျဉ်းဝေဒနာခံစားရတယ်။ စိတ်အာရုံစူးစိုက်မရဘဲ စိတ်ဓာတ်ကျလွယ် ထိခိုက်လွယ်လာတယ်။ အသက်ကြီးသူတွေမှာ ဖြစ်ရင် မှတ်ဥာဏ်ချို့ယွင်းလာတယ်။ ဦးနှောက်ဆဲလ် ပျက်ဆီးမှု မြန်ဆန်လာတယ်။ စိတ်အာရုံလေးလံ ထိုင်းမှိုင်းလာတယ်။ ကလေးငယ်တွေမှာ ကြီးထွားမှုနှေးကွေးလာတယ်။ ဦးနှောက်ဖွံ့ဖြိုးမှု နောက်ကျလာတယ်။ စာသင်ကြားရာမှာ အခက်အခဲဖြစ်နိုင်တယ်။ 

ပုံမှန်လူတယောက်ဟာ နေ့စဉ် ဗီတာမင် ဘီတွဲ 1-25 mcg ကြား လိုအပ်ပါတယ်။ဘီတွဲချို့တဲ့သူတွေအတွက် 25-100mcg လောက် နေ့စဉ် လိုအပ်တယ်။pernicious anaemia သွေးအားနည်းခြင်းအတွက် ဘီတွဲထိုးဆေး 300-10,000mcg လောက် အသုံးပြုရတယ်။ နှင်းခူနာလိုနာတာရှည်အရေပြားရောဂါအချို့မှာ vitamin B12 0.07%cream လ်ိမ်းပေးနိုင်တယ်။ psoriasis အရေပြားရောဂါမှာ avocado oilနဲ့ ရောပြီး တနေ့ နှစ်ကြိမ် ၃လကြာ လ်ိမ်ပေးတယ်။ homocysteine ပမာဏများသူ၊နှလုံးရောဂါရှိသူတွေမှာ ဘီတွဲ 500mcgလောက် လိုအပ်နိုင်တယ်။ ဗီတာမင် ဘီတွဲအားဆေး သီးသန့်တွေမှာ methylcobalamin ပုံစံနဲ့ အလာများတယ်။ နှလုံးရောဂါ၊အာရုံကြောရောဂါတွေမှာ အသုံးပြုတယ်။ တခါတရံ vitamin B6,folic acidနဲ့ ရောပေးရတယ်။

ဘီတွဲမသောက်ခင် သတိထားစရာအချက်တွေလည်းရှိပါတယ်။ ဘီတွဲဆိုတာ သတ္တုဓာတ်(cobalt)ပါဝင်တဲ့ တခုတည်းသော ဗီတာမင်ဖြစ်ပါတယ်။ ဒါ့ကြောင့် cobalt ဓာတ်မတဲ့သူတွေ  သတိထားသင့်တယ်။ နောက်လူသိနည်းတဲ့အချက်တခုက အားဆေးတွေမှာ ပါဝင်တဲ့ cyanocobalamin မှာ cyanide ဓာတ်တမျိုး ပါဝင်တယ်။ cyanideဓာတ်ဆိုတာ ဆေးလိပ်ငွေ့မှာပါဝင်တဲ့ အဆိပ်အတောက်ဖြစ်စေတဲ့ ဓာတ်တမျိုးပါ။ ပမာဏများရင် လူကို ဒုက္ခပေးနိုင်တယ်။ ဆေးလိပ်တလိပ်မှာ cyanide 40-100mcgလောက်ပါဝင်ပါတယ်။ cyanocobalamin 100mcg မှာပါဝင်တဲ့ cyanide ပမာဏဟာ 2mcgလောက်သာ ရှိလို့ မပြောပလောက်ဘူး။ လူကို လည်း ဒုက္ခမပေးနိုင်ဘူး။ သို့သော် cyanocobalamin  ပါတဲ့ အားဆေးသောက်တဲ့အခါ 1000mcg ထက် ပိုမသောက်ရဘူး။  ဘေးထွက်ဆိုးကျိုးအနေနဲ့ သွေးခဲတာ၊ဝမ်းလျှောတာ၊ဓာတ်မတဲ့တာ၊ယားတာမျိုး ဖြစ်နိုင်တယ်။ 

ဒေါက်တာ အေးမင်းထူး

ရတနာပုံသတင်းစာ(၁၇.၃.၁၄)