Thursday, October 2, 2014

သတ္တုဆိပ်သင့်ခြင်း

ဆရာ
mercury သို့မဟုတ် Lead အဆိပ်သင့်တာကို ဘယ်လို ကုသရမလဲ သိလိုပါတယ်ခင်ဗျား။ မက်ဆေ့ဘောက်က မေးရင် ရှည်မှာမို့ အီးမေးပို့လိုက်ရပါတယ်။
ကျွန်တော် အတန်းထဲမှာ စာညံ့လာတာ၊ short-term memory အားနည်းလာတာ၊ ဆရာ စာသင်ရင် စိတ်တခြားလူတခြား ဖြစ်နေုပြီး ဘာတွေ သင်လို့ သင်သွားမှန်း မသိလိုက်တာတွေ ခံစားရပါတယ်။ 
ကျွန်တော် ခံစားရတဲ့ လက္ခဏာတွေကို စစ်ဆေးပြီး မာကျူရီ ဒါမှမဟုတ် ခဲဆိပ်သင့်တာ ဖြစ်နိုင်တယ်လို့ ပြောပါတယ်။ ကျွန်တော် အရင်က သွေးအားကောင်းအောင်ဆိုပြီး
ကျောက်သွေးကို ရေဖျော်သောက်တတ်တဲ့အကျင့်ရှိပါတယ်။ နီရဲရဲနဲ့ သံချေးရည်လို ဖြစ်ပြီး အရသာလဲ သံချေး သတ္တုချေး အရည်ကို သောက်ရတာနဲ့ တူပါတယ်။ အခု ဖြစ်တာ အဲဒါနဲ့တော့ ဆိုင်မလား မသိဘူး။ 
ဘာတွေ လုပ်ရမလဲဆရာ။ ကျွန်တော် ပုံမှန်ပြန်ဖြစ်ဖို့ဆို ဘာပဲလုပ်ရလုပ်ရ လုပ်ပါ့မယ်။ ပညာရေးရော ဘ၀တက်လမ်းရော အားလုံး အကြီးအကျယ် ထိခိုက်နေလို့ပါ။
ဗီတာမင်ဘီနဲ့ သတ္တုဓာတ်တွေလဲ မချို့တဲ့အောင် ဂရုစိုက်ရမယ်ဆိုလို့ ဗီတာမင်အားဆေး သောက်နေတာ  ၃ လကျော်ပြီဆရာ။ သိပ်မထူးခြားလို့ သောက်တဲ့ပမာဏ နည်းနေလို့လား၊ ဘယ်လောက်ထိ အလွန်ဆုံး နေ့စဉ် သောက်နိုင်လဲ သိချင်ပါတယ်။ ကျွန်တော် သောက်တဲ့ အားဆေးမှာ ပါတဲ့ ဗီတာမင်တွေက ဆေးတစ်လုံးမှာ-
B 1.1 mg
B2 1.4 mg
B3 1.6 mg
B5 6 mg
B6 1.4 mg
B9 200 mcg
B12 2.5 mcg
နေ့စဉ် ဘယ်နှစ်လုံး အလွန်ဆုံး သောက်ရမလဲဆရာ။ ဗီတာမင်ဘီက ရေမှာပျော်ဝင်တာမို့လို့ high dose သောက်လဲ ကိုယ်ထဲမှာ ပိုလျှံတာ ဖြစ်ခဲတယ်ဆိုတာ ဟုတ်ပါသလား။ Vitermin B deficiency ရှိရင် ဘယ်နှစ်လုံး သောက်ရပါမလဲ။ 
ကျန်တဲ့ဆေးအနေနဲ့ မဂ္ဂနီစီယမ်နဲ့ ကယ်လ်စီယမ် သောက်ရမယ်ဆိုလို့ သောက်ပါတယ်။ အဲဒါလဲ ကျွန်တော့်မှာ ချို့ငဲ့နိုင်တယ်ဆိုလို့ နေ့စဉ် သောက်သင့်တဲ့ ပမာဏ ပြောပြပါခင်ဗျာ။
detoxify ဖြစ်စေဖို့ အစိမ်းရောင် ဟင်းသီးဟင်းရွက်တွေ များများစားပေးပါဆိုလို့ ဒါလဲ စားပါတယ်။ 
ဘာတွေ လုပ်ဖို့ လိုအပ်သလဲ. ဘာတွေ လိုက်နာရမလဲ ဖြေဆိုပေးစေချင်ပါသည်ခင်ဗျား။
လေးစားစွာဖြင့်
......



မေးထားတဲ့အပိုင်းက သတ္တုဆိပ်သင့်တာဖြစ်ပါတယ်။ ဝင်နိုင်တဲ့နည်းတွေက အမျိုးမျိုးရှိတယ်။ မျိုချမိတာ၊ရှုရှိုက်မိတာနဲ့ အရေပြားလွှာက စုပ်ယူလိုက်တာမျိုး ဖြစ်တယ်။ သတ္တုတွေဝင်လာရင် ခန္ဓာကိုယ်ရဲ့ soft tissue မှာ သိမ်းဆည်းထားတယ်။ပြဿနာတခုက ဝင်လာပြီး တခြားခန္ဓာကိုယ်တွင်း ပရိုတင်းတွေနဲ့သွားပေါင်းတယ်။ ရလာဒ်ကတော့ အင်ဇိုင်းလုပ်ဆောင်မှု ပျက်ပြားစေပြီး ဇီဝကမ္မပြောင်းလဲလာပြီး ခန္ဓာကိုယ်တွင်း အစိတ်အပိုင်းတွေကို ဒုက္ခပေးတော့တယ်။ အဖြစ်များတဲ့သတ္တုတွေက ခဲဆိပ်၊မာကျူရီ၊သံဓာတ်၊ကတ်ဒ်မီယမ်(Cadmium)၊သယ်လ်လီယမ်(Thallium)၊ဘစ်စ်မတ်နဲ့ အာဆင်းနစ်ဓာတ်တွေ ဖြစ်ကြတယ်။

ဒီသတ္တုတွေထဲမှာ အဖြစ်များဆုံးက lead poison ခေါ်တဲ့ ခဲဆိပ်သင့်တာဖြစ်ပါတယ်။ ခဲဆိပ်ကို ရှုရှိုက်မိလို့၊မျိုချမိလို့ဖြစ်ကြတယ်။ ခဲဆိပ်က ခန္ဓာကိုယ်ထဲ ဖြည်းဖြည်းချင်းဝင်ပေမယ့် ပိုဆိုးတယ်။ ဦးနှောက်နဲ့အာရုံကြောကို ဆိုးရွားစွာထိခိုက်စေပြီး ကျောက်ကပ်ကိုပါ ဒုက္ခပေးတယ်။ ဦးနှောက်ဆဲလ်သဘောက ပျက်ဆီးရင် ပြန်မကောင်းတော့ပါ။  သွေးပေါင်ပါတက်လာတယ်။ သွေးနီဥသက်တမ်းတိုသွားပြီး သွေးအားနည်းရောဂါ(hypochromic microcytic anaemia)ကိုပါ ဖြစ်စေတယ်။ သံဓာတ်အားနည်းရင် ခဲဆိပ်ကို စုပယူမှုများလို့ ပိုဆိုးတယ်။ ငယ်လေ အူလမ်းကြောင်း အဆိပ်အတောက်ဖြစ်စေပဲ ဖြစ်ပါတယ်။

ဘာတွေကဖြစ်နိုင်လဲ
သတ္တုတွင်းတူးဖော်သူတွေမှာ ခဲဆိပ်အငွေ့ရှုရှိုက်ခြင်းကြောင့် ဖြစ်ကြတယ်။ ခဲသတ္တုအရည်ကျိုတာ၊ရောစပ်တာ၊သန့်စင်တာတွေကလည်း ဖြစ်ကြတယ်။ရေနံ၊သုတ်ဆေး၊မှုတ်ဆေးနဲ့ ဆီသွပ်ဗူးတွေကတဆင့် ဖြစ်နိုင်တယ်။ကလေးတွေမှာ ဓာတ်ခဲ၊မီးသီးကိုက်ရာကနေဖြစ်နိုင်တယ်။ ဘက်ထရီပြင်တဲ့နေရာတွေက ခဲဆိပ်သင့်နိုင်တဲ့နေရာတွေဖြစ်ပါတယ်။လေ့လာချက်တွေအရ လူကြီးတွေထက် ကလေးတွေမှာ ပိုအဖြစ်များတယ်။ ကလေးသုံးနှစ်အောက်တွေ ပိုဖြစ်ကြတယ်။လူကြီးတွေမှာ အလုပ်အကိုင်နဲ့ ပိုဆိုင်တယ်။ ပတ်ဝန်းကျင်မှာထိတွေ့မှုများရာက ဖြစ်တယ်။ သဘာဝအားဆေး၊တိုင်းရင်းဆေးဆိုတာတွေ သုံးစွဲရာကဖြစ်နိုင်တယ်။ နောက်ပိုင်းမှာ ခဲသတ္တုသုံးတာကို တတ်နိုင်သမျှ လျှော့ချလာကြတယ်။ ကလေးသူငယ်ဆိုင်ရာ ပစ္စည်းတွေမှာ ခဲသတ္တုမသုံးဖို့ပြောလာကြတယ်။ ရိုးရာဆေးဝါး(folk remedies)တွေသုံးတဲ့အခါ သတိရှိဖို့ ပညာပေးလာကြတယ်။ 

သတ္တုဆိပ်သင့်ရင် ယာယီနဲ့နာတာရှည် ဆိုပြီး ခွဲထားတယ်။
လက္ခဏာတွေက  IQ နည်းလာတာနဲ့ အမူအကျင့်ပြောင်းလဲလာတာဖြစ်ပါတယ်။ စိတ်အာရုံမစုစည်းနိုင်ကြတော့ဘူး။ဗိုက်နာတာ၊ပျို့အန်ချင်တာ၊အသားဝါတာစိတ်လေလွင့်သလိုခံစားရတာ၊လုပ်ချင်ကိုင်ချင်စိတ်ပျောက်တာ၊ ကယောင်ကတန်းဖြစ်တာ၊ တက်တာမျိုးတွေ ဖြစ်နိုင်တယ်။

ခဲဆိပ်သင့်တာ ကြာလာတာနဲ့အမျှ အောက်ပါလက္ခဏာတွေ ခံစားရတယ်။ဗိုက်နာတာ၊ဝမ်းချုပ်တာ၊စိတ်တိုလွယ်တာ၊ခေါင်းကိုက်တာ၊ အကြားအာရုံချို့တဲ့တာ၊ခြေ၊လက်အားယုတ်တာ၊ကလေးရဖို့ခက်ခဲတာ၊ သတိမေ့တတ်တာ၊သတိလက်လွတ်ဖြစ်တာ၊မှတ်ဥာဏ်တဖြည်းဖြည်း ယိုယွင်းတာလာတွေ ဖြစ်တယ်။တခါတရံကျောက်ကပ်ရောင်တဲ့ လက္ခဏာတွေနဲ့ တွဲဖက်နိုင်တယ်။သိသာတဲ့လက္ခဏာတွေက သွားဖုံး ပြာတာ၊သွေးအားနည်းတာ၊အအိပ်အစားနည်းတာ၊အငြိမ်မနေတာ၊မှတ်မိနိုင်စွမ်းအားနည်းတာ၊ကြွက်သားအားနည်းလာတာထိမှုသိမှု အာရုံခံစားမှု၊လှုပ်ရှားမှု နည်းပါးလာတာတွေ ရှိတယ်။

ခဲဆိပ်လို့ ဘယ်လိုသိနိုင်လဲ
အကယ်၍ သွေးထဲမှာ ခဲဓာတ် ≥10 μg/dL များရင် ခဲဆိပ်သင့်တယ်လို့ သတ်မှတ်ပါတယ်။ ကလေးတွေမှာ အရင်ဆုံး မှတ်ဥာဏ်အားချို့ယွင်းလာတယ်။ 45 μg/dL အထက်ရောက်ရင် အစာအိမ်နဲ့ အူလမ်းကြောင်းဆိုငရာ လက္ခဏာတွေ ပေါ်ပေါက်လာတယ်။70 μg/dL ထက်ကျော်ရင် ဦးနှောက်နဲ့ အာရုံကြောကိုဆိုးဆိုးဝါးဝါး ထိခိုက် နေပြီး 100 μg/dLကျော်ရင်တော့ အသက်အန္တရာယ်ပါ စိုးရိမ်လာရပြီ။ ကလေးတွေမှာ X ray ဓာတ်မှန်ရိုက်ရင် ပေါင်ရိုးတွေမှာ lead band အစင်းကြောင်းတွေ အလျားလိုက်တွေ့ရတယ်။

ဘယ်လိုကုသလဲ
ရုတ်တရက် မျိုချမိပြီး အခြေအနေဆိုးရင်(lead >60 μg/dL)  နှာခေါင်းပိုက်တပ်ပြီး polyethylene glycolနဲ့ ဆေးရတယ်။calcium disodium edetate ကို အကြောဆေး ဒရစ်သွင်းရတယ်။ အဆိပ်ချေဖျကိတဲ့ဆေး(chelator)ပေးပြီး သတ္တုနဲ့ပေါင်းပြီး စွန့်ထုတ်နိုင်အောင် ကူညီပေးရတယ်။ သွေးပေါင်ကောင်းအောင် normal salineချိတ်ပေးတယ်။ရုတ်တရက်အသည်းအသန်လူနာတွေမှာ သေချာကြပ်မပ်ကုသပေးရင် သက်သာလာပါတယ်။အနောက်နိုင်ငံတွေမှာ သေဆုံးမှုနည်းတယ်။

ဖြည်းဖြည်းချင်းဖြစ်တာ ဒါမှမဟုတ် သိပ်မဆိုးရင် အဆိပ်ဖြေဆေး(Oral chelation therapy) ပေးနိုင်တယ်။ Dimercaptosuccinic acid (DMSA, or succimer) ဆိုတာလည်း သုံးတယ်။ မကောင်းတာက ကြီးထွားမှုကို နှောင့်နှေးစေနိုင်တယ်။ D-penicillamine လည်း အသုံးများတယ်။ မကောင်းတာက သွေးဖြူဥနဲ့ သွေးဥမွှားကို ထိခိုက်စေတာပါ။ သတိပြုရမှာက ဖြေဆေး(Chelation therapy )ဖြတ်တဲ့အခါ ခပ်ဖြည်းဖြည်း ဖြတ်ပေးရတယ်။ မဟုတ်ရင် အရိုးထဲက ဓာတ်တွေပါထွက်လာပြီး ရုတ်တရက် ပြန်ဖြစ်တတ်တယ်။

ရေရှည်မှာ ဘာတွေဆက်ဖြစ်လဲ
ဦးနှောက်အပြင် တကိုယ်လုံးကို ထိခိုက်နိုင်တယ်။ အဆိပ်အတောက်ကို စွန့်ထုတ်ပေးတဲ့ အသည်းနဲ့ကျောက်ကပ်ကိုပါ ထိခိုက်စေတယ်။ တခါတရံ အဆိပ်ဖြေဆေးကိုယ်တိုင်က သွေးတိုး၊ကျောက်ကပ်နဲ့ ဦးနှာက်ကိုထိခိုက်စေတာမျိုး ရှိတယ်။ကလေးတွေမှာ ခဲဆိပ်သင့်တဲ့အခါ သင်ကြားမှုနဲ့ သင်ယူမှုအပြင် စိတ်ခံစားမှု၊အမူအကျင့်တွေပြောင်းလဲလာတာကလည်း ပညာရေးကို ထိခိုက်စေတယ်။ ရေရှည်မှာ လှုပ်ရှားမှုနဲ့ဆိုင်တဲ့ အာရုံကြောတွေ ထိခိုက်လာတာ၊စိတ်ကျလွယ် စိတ်တိုလွယ်တာ၊အမူအကျင့်ပြောင်းလဲတာနဲ့ မျိုးပွားနိုင်စွမ်းကိုပါ ထိခိုက်စေလာတယ်။ 


မာကျူရီဆိပ်သင့်တာ
မာကျူရီဓာတ် 10-50 mg/kg ထက်များရင် အဆိပ်သင့်နိုင်တယ်။ အူလမ်းကြောင်းက မစုပ်ယူနိုင်တာကြောင့် ဒုက္ခသိပ်မပေးနိုင်ပေမယ့် အရေပြားကတဆင့် စုပ်ယူနိုင်တယ်။စက်ရုံတွေမှာသုံးတဲ့ ကျောက်မီးသွေးမီးလောက်ရင် မာကျူရီတွေ ထွက်သွားတယ်။ပြဒါးဆိပ်သင့်တာကျတော့ ပင်လယ်ငါး၊ပိုးသတ်ဆေးနဲ့ ပြဒါးတိုင်လိုပစ္စည်းတွေကဖြစ်တယ်။
ရေတိုလက္ခဏာတွေက တုပ်ကွေးဆန်ဆန် ကြွက်သားနာတာ၊အစာအ်ိမ်နာတာ၊စိတ်တိုလွယ်တာ၊အာရုံကြောပျက်ဆီးတာ၊အသည်းကျောက်ကပ်ထိခိုက်စေတာတို့ဖြစ်တယ်။ 

ဘာတွေလုပ်ကြလဲ
မာကျူရီကို ရှုရှိုက်မိပြီး အဆိပ်သင့်တဲ့အခါ အဆုတ်ကို ထိခိုက်တာသက်သာစေဖို့ hydrocortisoneကို အကြောထဲထိုးပေးရတယ်။ ပါးစပ်ကမျိုချမိရင်  d-penicillamine ပေးပြီး သက်သာစေတယ်။ 

မေးထားသူအတွက် ဖြေရှင်းချက်
-လက္ခဏာက ခဲဆိပ်သင့်တာနဲ့ ပိုတူတယ်။ 
-ဒီအတွက် ဆရာဝန်နဲ့ သေချာစနစ်တကျ ကုသဖို့လိုအပ်ပါတယ်။
-မေးထားတဲ့ ဗီတာမင်ဆေးတွေကတော့ ပမာဏနည်းလွန်းတယ်။ တခြားဆေးတမျိုးမျိုးပြောင်းသောက်ပါ။ ရေများများသောက်ပါ။
-ဗီတာမင် ဘီနည်းနည်းပါးပါးပိုသောက်တာကို ခန္ဓာကိုယ်က စွန့်ထုတ်နိုင်တယ်။
-အာရုံကြောအတွက် vitamin B1,6,12ပါတာတွေ သောက်ပါ။
-coQ10 ပါတဲ့ဆေးမျိုးလိုအပိနိုင်တယ်။ 30mg တနေ့ သုံးကြိမ်သောက်ပါ။
-calcium ရော magnesium ပါ ပါဝင်တဲ့ဆေးက ostocal-M ဆိုတာရှိတယ်။ တနေ့၂ကြိမ်သောက်ပါ။ 
-ကမ္ဘာဦးရွက်(ginkgo biloba)ဆေးသောက်ပါ။ bio-biloba 100mg တနေ့ ၂ကြိမ်သောက်ပါ။ 
-mega 3 ကို တနေ့ ၂ကြိမ်သောက်ပါ။ 
-အရင်ကသောက်နေတဲ့ သံဓာတ်လို တိုင်းရင်းဆေးကို မသောက်ပါနဲ့။
-ဗီတာမင် အားဆေးတွေအကြောင်း တခုချင်းအသေးစိတ်ရေးထားပါတယ်။ ဆေးဝါးကမ္ဘာဘလော့ခ်မှာ ဝင်ဖတ်ပါ။

ဒေါက်တာ အေးမင်းထူး
၁၈.၉.၁၄



ဆရာ

အတိအကျပဲဆရာ။ ဆရာ ပြောတဲ့လက္ခဏာတွေက ကျွန်တော်ဖြစ်နေတာနဲ့။
စိတ်အာရုံမစုစည်းနိုင်ကြတော့ဘူး။စိတ်လေလွင့်သလိုခံစားရတာ၊လုပ်ချင်ကိုင်ချင်စိတ်ပျောက်တာ၊ 

အဲဒါတွေ ကွက်တိပဲဆရာ။ ကျွန်တော့်ကို ပြောနေတဲ့အတိုင်းပဲ။ အော့အန်တာ တခါတလေတော့ ဖြစ်တယ်။ အသားဝါမ၀ါက ကျွန်တော်လဲ သတိမထားမိဘူး။

ပရဆေး မသောက်တော့ဘူး။ ဗီတာမင်တွေဓာတ်တွေအကြောင်း ဆောင်းပါးတွေ ဆရာ့ဘလော့မှာ လာ၇ှာသွားပါတယ်။ 

ကျေးဇူးအထူးဖြင့်
.......

No comments:

Post a Comment