ဆရာဝန်ထံမှ မိတ်ဆက်စာ

ဆရာ့ကို ကျေးဇူးတင်လို့စာရေးလိုက်တာပါ။ ကျနော်က ဒေါက်တာ_ပါ။မန္တလေးက ပါပဲ။အခုလောလောဆယ် မြို့သစ် စက်မှု_လမ်းနဲ့_လမ်းမှာ ဆေးခန်းဖွင့်ထားပါတယ်။မနှစ်က ဘွဲ့ရထားတာပါ။ အလုပ် မခေါ်သေးလို့ ဆေးခန်းတနေကုန် ဖွင့်ထားပါတယ်။ တရက်က ဖုန်းသုံးနေရင်း ဆေးဝါးအကြောင်းဆိုပြီး ရိုက်ထည့်လိုက်တော့ ဆရာရေးထားတဲ့ဆေးဝါးစာတွေကျလာပါတယ်။တိုက်တိုက်ဆိုင်ဆိုင် ဒီရက်ပိုင်းအတွင်း ခေါင်းတခြမ်းကိုက်တဲ့လူနာနှစ်ယောက်လောက် ကျနော်ဆီရောက်လာပါတယ်။ တယောက်ကပျောက်သွားပေမယ့် နောက်တယောက်က မပျောက်ပဲ ကျန်နေတာ
၂ရက်လောက်ရှိပါပြီ။ မပျောက်နိုင်လို့ ကျနော် လည်း ချွေးပြန်နေတာ။ဆရာရေးထားတဲ့ avamigran ဆေးကိုဖတ်မိပြီး စမ်းသုံးကြည့်တော့ အခုတော်တော်ကောင်းသွားပါပြီ။အရင်ကအဲဆေးရှိမှန်းမသိလို့ပါ။ဆေးကဈေးတော့ကြီးတယ်နော်ဆရာ။ကျနော်တို့ဆီက ဈေးကို ၁၅၀၀၊၂၀၀၀အပြင် ပိုတောင်းလို့မရပါဘူး။ဘာပဲပြောပြောလူနာသက်သာသွားတဲ့အတွက် ဝမ်းသာပါတယ်။ဖြစ်နိုင်ရင် ဒီလိုဆေးတွေရှိရင် မျှဝေပေးပါဦး။ကျနော်ကတော့ တခါလာ လည်း dicloဆိုတာချည်းသုံးနေရတော့ ငြီးငွေ့လာပြီ။ဆရာ့ဆိုက်မှာ ဆေးအသစ်တွေရှိရင် ရေးပေးတင်ပေးပါဦး။

အခုလိုကြားရတဲ့အတွက် ဝမ်းသာပါတယ်ဆရာရေ။ ရေးဖို့လည်း အားရှိလာပါတယ်။အမှန်က ကျွန်တော်တို့မသိသေးတဲ့ဆေးတွေ အများကြီးရှိပါသေးတယ်။ ဒီနေရာမှာ ဆရာနဲ့ကျွန်တော် အတွေးအခေါ်ချင်း တူပါတယ်။ တခါလာလည်းdiclofenacထိုးတာ၊ဂလူးကို့စ်ထိုးတာမျိုး ကျွန်တော်တော့် အားမပေးချင်ဘူး။ ဆေးဝါးကမ္ဘာဘလော့ခ်မှာ ကျွန်တော်လည်း အသစ်တွေရေးပေးချင်ပါတယ်။ ဒါပေမယ့် ဒီဘက်မှာ အချိန်က အရေးကြီးတယ်ဆရာရေ။မျှခြေဖြစ်အောင် ရေးနေရတယ်။ ပြဿနာတခုက ဆေးဝါးအကြောင်းသိချင်သူအများစုက လူနာတွေပါ။ အသုံးများတဲ့ဆေးတွေ၊ဘေးထွက်ဆိုးကျိုးတွေ သူတို့ကပိုသိချင်ကြတယ်။ ဆရာဝန်တွေဆိုတာကလည်း သိပြီးသားဆေးတွေဆိုရင် မျက်စိညောင်းခံမဖတ်ချင်ဘူးဗျ။ ဆေးအသစ်တွေရေးတာ ကောင်းပေမယ့် ဖတ်အားမှာတော့ အသုံးများဆေးတွေကို ပိုဖတ်တာတွေ့ရတယ်။သဘောက စာဖတ်ပရိသတ်က လူနာတွေများတယ်ဆိုတဲ့သဘော။ ဥပမာ purifenလို ဆေးရေးတဲ့အခါ လူစိတ်ဝင်စားမှုနည်းပေမယ့် ကီနိုဟီမစ်ဆုလို အသားလှဆေးအကြောင်းရေးတဲ့အခါ စာဖတ်ပရိသတ်တွေများတာ တွေ့ရတယ်။ နောက်တချက်က ကျွန်တော့်ဖက်က ပေးနိုင်တဲ့အချိန်ပါ။ စာရေးဖို့အတွက် ပြန်လေ့လာရတဲ့အပိုင်း ရှိပါတယ်။ ပြီးရင် နားလည်လွယ်အောင်ရေးရတယ်။ညနေဆေးခန်းထိုင်ပြီး ၈နာရီနောက်ပိုင်းမှ အားပါတယ်။ တကယ်စာရေး၊စာကြည့်ဖြစ်တဲ့အချိန်က ၉နာရီနောက်ပိုင်းလောက်မှပါ။ မေးတာလေးတွေ တတ်သလောက်မှတ်သလောက် ပြန်ဖြေနေရသလို ဆေးပညာအကြောင်းလည်း ပြန်ဖတ်ရပါတယ်။ဒါတောင် မေးခွန်းတွေသိပ်မများသေးလို့ စာကြည့်နေနိုင်တာပါ။ အခု ၁၀နာရီနောက်ပိုင်း ရောက်လာတဲ့ မေးခွန်းတွေ ကျွန်တော်ပြန်မဖြေတော့ပါဘူး။ နောက်ရက်မှ ပြန်ဖြေပါတယ်။လူနာကြည့်ဖို့ စာဖတ်အားလည်း လိုသေးတယ်မလား။ ကျွန်တော်က စာရေးအားသိပ်ကောင်းတဲ့ထဲမှာ မပါဘူးဗျ။ သူများတွေလို တစ်ရက် တစ်ပုဒ်လောက် ရေးချင်တယ်ဗျာ။ ပိုဆိုးတဲ့အချက်က အခုတလော မျက်စိပါဝါတက်နေတာပဲ။ မျက်ရိုးက ကိုက်လာတော့ အချိန်တခုထားပြီး ကြည့်ရတယ်။ တတ်နိုင်သလောက်တော့ ဆေးအကြောင်း အသစ်၊အဟောင်း ရေးပါဦးမယ်။ အားပေးစကားပြောလာတဲ့အတွက် ကျေးဇူးတင်ရပါတယ်။

ဒေါက်တာ အေးမင်းထူး

၃၀.၇.၁၃