စင်္ကာပူမှာ ဆေးစစ်ခြင်း(ပထမပိုင်း)

နိုင်ငံခြားမှာ ဆေးကုတာ၊ ဆေးစစ်တာက မြန်မာနိုင်ငံမှာ အတော်ခေတ်စားလာပါပြီ။ ကနေ့ခေတ် ငွေကြေးတတ်နိုင်သူအများစုဟာ နိုင်ငံခြားမှာသာ သွားရောက်ကုသကြတော့တယ်။ အထူးသဖြင့် အိမ်နီးချင်းနိုင်ငံတွေဖြစ်တဲ့ ထိုင်းနဲ့စင်္ကာပူဟာ မြန်မာတွေ သွားရောက်ကုသတဲ့ တိုင်းပြည်တွေ ဖြစ်ကြတယ်။ ဆေးကုသသူတွေကို လေ့လာကြည့်ရင်နှစ်မျိုး၊နှစ်စားတွေ့ရတယ်။ အလယ်လတ်တန်းစားလူများစုဟာ ထိုင်းနိုင်ငံ ဘန်ကောက်မှာ သွားရောက်ကုသလေ့ရှိတယ်။ ဘာ့ကြောင့်လည်းဆိုတော့ ခရီးအကွာအဝေးတိုပြီး ငွေးကုန်ကြေးကျ သက်သာလို့ဖြစ်ပါတယ်။ 

ယဉ်ကျေးမှုအရ ဘန်ကောက်ဟာ မြန်မာနဲ့ ပိုမိုနီးစပ်တယ်။ သို့သော်  ငွေကြေးတတ်နိုင်သူ အများစုကတော့ စင်္ကာပူမှာပဲ ကုသကြပါတယ်။ စင်္ကာပူရဲ့ ကျန်းမာရေးအဆင့်အတန်းက အရှေ့တောင်အာရှမှာ ပိုမြင့်မားလို့ဖြစ်ပါတယ်။

စင်္ကာပူဟာ စီးပွားရေးအင်အားအကောင်းဆုံး အာရှကျားလေးကောင်မှာပါတဲ့ နိုင်ငံတနိုင်ငံဖြစ်ပါတယ်။ ၁၈၁၉ ခုနှစ်မှာ ကိုလိုနီလက်အောက်ခံ ကျွန်းစုအဖြစ် sir stamford raffles က စတင်သတ်မှတ်ခဲ့ပါတယ်။ သို့သော် အချုပ်အခြာပိုင်နိုင်ငံအဖြစ် ၁၉၆၅ ခုနှစ်မှာ မလေးရှားကနေ ခွဲထွက်ထူထောင်ခဲ့ပါတယ်။ အဲဒီအချိန်က အရှေ့တောင်အာရှမှာ မြန်မာနိုင်ငံက စီးပွားရေးအရကော ပညာရေးအရရော ထိပ်တန်းနိုင်ငံတခုဖြစ်ခဲ့ပါတယ်။ စင်္ကာပူက လက်ရှိအထူးကု ဆရာဝန်ကြီးတွေတောင် ငယ်စဉ်က ရန်ကုန်တက္ကသိုလ်မှာ စာသင်ခဲ့ဖူးတယ်လို့ ကျွန်တော်နဲ့ တွေ့တော့ ပြောပြခဲ့ကြသေးတယ်။ သို့သော် အချိန်က အရာအားလုံးကို ပြည်ဖုံးကားချပြီး တိုက်စားခဲ့ပါပြီ။ ဒီနေ့ဒီအချိန်မှာတော့ စီးပွားရေး၊ပညာရေး၊ ကျန်းမာရေးကအစ အဖက်ဖက် သာလွန်နေတဲ့ စင်္ကာပူနိုင်ငံမှာ မြန်မာတွေ သွားရောက်ကုသကြတဲ့ခေတ် ရောက်လို့လာပါပြီ။

စင်္ကာပူမှာ နာမည်ကြီးဆေးရုံတွေ အများအပြားရှိနေတယ်။ Raffles, Mount Elizabeth novena, Mount Elizabeth orchard, glenealges, parkway east, mount alvernia, thomson စတာတွေဖြစ်တယ်။ ဒီထဲမှာ thomson ဆေးရုံဟာ အမျိုးသမီးနဲ့ ကလေးအထူးကုဌာနဖြစ်ပါတယ်။ IVF လို ဖန်ပြွန်သန္ဓေသားကို သွန်မဆင်ဆေးရုံမှာသာ ပြုလုပ်ကြတယ်။ ဒီထဲမှာမှ ရက်ဖဲလ် ဆေးရုံကို ဆေးစစ်ဖို့ ရွေးချယ်ခဲ့တယ်။ ဆေးစစ်တဲ့အခါ သွားရေးလာရေးနဲ့ လူကြိုဖို့ ulink ကုမ္ပဏီကို ဖုန်းဆက်ရတယ်။ ulinkဟာ ဆေးကုမ္ပဏီမဟုတ်ဘူး။ စင်္ကာပူဆေးရုံတွေနဲ့ ချိတ်ဆက်ထားတဲ့ ကုမ္ပဏီကြီးတခုဖြစ်တယ်။ လေယာဉ်လက်မှတ်အစ၊ အပို့အကြိုအထိ သူတို့အားလုံး လုပ်ပေးတယ်။ ဟိုရောက်ရင် လူကြိုတာကအစ ဆေးရုံရောက်တဲ့ထိ လိုလေသေးမရှိ ကူညီပေးမယ်လ်ု့ အကြောင်းပြန်တယ်။

အခုခ်ျန်မှာ မန္တလေး- စင်္ကာပူ တိုက်ရိုက်လေကြောင်းလိုင်းတွေရှိနေပါပြီ။ ပြည်ဝင်ခွင့် ဗီဇာမလိုတော့တာမို့ တပတ်ကို သုံးရက်ထိ ပျံသန်းပေးတယ်။ ကျတော်က ကံဆိုးချင်တော့ တိုက်ရိုက်လေယာဉ်လက်မှတ်မရဘူး။ နည်းနည်းပိုပန်းသွားတယ်။ မန်းလေးကနေ ရန်ကုန် မနက်ဆင်း၊ညနေပိုင်း ရန်ကုန်ကနေ စင်္ကာပူဆက်ထွက်ခဲ့တယ်။ စင်္ကာပူရောက်တော့ ပြောထားတဲ့တိုင်း ulink က လာကြိုပေးတယ်။ အထုပ်အပိုးတွေ လာသယ်ပြီး တည်းခိုမယ့် york hotel ထိ လိုက်ပို့ပေးတယ်။ york hotelက သွားရေးလာရေးအဆင်ပြေတယ်။ Elizabeth ဆေးရုံနဲ့ နီးတယ်။ နာမည်ကျော်orchard road(အော်ချက်လမ်း) နဲ့ ကပ်ရပ်ဖြစ်တာကြောင့် ဈေးဝယ်လို့လည်း ကောင်းတယ်။ ဆေးစစ်ရမယ့် raffles ဆေးရုံနဲ့လည်း မနီးမဝေးပါ။ 

သို့သော် ကြံဖန်တ်ုက်ဆ်ုင်ချင်တော့ လေယာဉ်ဆိုက်ချိန်က ညကိုးနာရီ၊ ဟော်တယ်ရောက်တဲ့အချိန်မှာ ည ၁၀:၃၀ မို့အစားစားလို့ မရတော့ပါ။ နောက်ရက်ဆေးစစ်မယ့် ထဲမှာ သွေးတွင်းအဆီစစ်တာပါနေတယ်။ သွေးတွင်းအဆီကအစာငတ်ခံ(အနည်းဆုံး ၈-၁၂နာရီ) ပြီးမှ စစ်ရတာမျိုးပါ။ ဒါ့ကြောင့် ဗိုက်ဆာပေမယ့် မတတ်နိုင်။ အူကတော့ တကြုတ်ကြုတ်နဲ့။

နောက်နေ့မနကိရောက်တော့ raffles မှာဆေးစစ်ဖို့ ulink က လာခေါ်ပေးတယ်။ အဖော်ရစေဖို့  ဒေါက်တာ ဇင်မာနိုင်ကိုလည်း ထည့်ပေးတယ်။ ဒေါက်တာဇင်နဲ့က အခုမှ လူချင်းတွေ့ဖူးတာ။ ဆေးစစ်မယ်ဆိုတော့ စိတ်နည်းနည်းလှုပ်ရှားလာတယ်။ ဆေးရုံရောက်တော့ စိုးရိမ်တာတွေ အနည်းငယ်ပျောက်သွားပါပြီ။  ဆေးနံ့၊ပိုးသတ်ဆေးနံ့လုံးဝမရဘဲ ဟော်တယ်လိုဖြစ်နေတာကြောင့်ပါ၊မေးကြည့်တော့လည်း ဟော်တယ်ဆန်ဆန်တည်ဆောက်ထားတယ်လို့ ဝန်ခံတယ်။ ပိုအဆင်ပြေချင်တော့ raffles မှာအလုပ်လုပ်တဲ့ မြန်မာဆရာဝန် ဒေါက်တာထိန်လင်းက လာစောင့်ပေးနေပါတယ်။ အခုကျတော့်ဘေးမှာ မြန်မာလူမျိုးဆရာဝန် နှစ်ယောက်ရှိနေခဲ့ပါပြီ။ တယောက်က ulink က ဒေါက်တာဇင်၊နောက်တယောက်က ရက်ဖဲလ်က ဒေါက်တာ ထိန်။(သူတို့ဆီမှာ နာမည်အတိုကောက်ကိုသာခေါ်ကြတယ်။)

 မြန်မာလူမျိုးချင်းတွေ့တော့ ထုံးစံအတိုင်း စကားတွေဖောင်ဖွဲ့ပြောကြတယ်။သူ့အကြောင်း ကိုယ့်အကြောင်းမျိုးစုံပါပဲ။ နောက်တော့ ဒေါက်တာထိန်က ဆေးစစ်ရမယ့် အထပ်ကို ခေါ်သွားတယ်။ သူတို့ဆီမှာ ဆေးမစစ်ခင် အရင်နားရပါသေးတယ်။ ဆေးရုံမှာ နိုင်ငံအလိုက် အနားယူတဲ့ အခန်းငယ်လေးတွေရှိတယ်။ ကျွန်တော်နားတဲ့အခန်းကyangon ဆိုတဲ့ နာမည်တပ်ထားတဲ့ သပ်သပ်ရပ်ရပ် အခန်းလေးပါ။ အဲဒီမှာ သုံးယောက်သား အေးဆေးအနားယူပြီးစကားစမြည်ပြောဖြစ်ကြတယ်။ ခဏနေတော့ ကျွန်တော်က သတိတရနဲ့ ကိုယ်တိုင်ရေးဝတ္တု ဖြစ်တဲ့ "ကောင်းကင်သစ်ကို ဖွင့်လှစ်ခြင်း"ကို လက်ဆောင်အဖြစ်ပေးခဲ့ပါတယ်။ (မှတ်ချက် -အဆိုပါဝတ္တုဟာ ထွက်ပြီး မကြာခင်မှာပဲ ရုပ်ရှင်အဖြစ် ရိုက်ကူးအသက်သွင်းဖို့ ကမ်းလှမ်းခံရတဲ့ စာအုပ်ဖြစ်ပါတယ်)

ကိုယ့်လူမျိုး ဆရာဝန်တွေချင်း အားပါးတရ စကားပြောရတော့ စိုးရိမ်တာတွေက ကိုးဆယ်ရာခိုင်နှုန်းလောက် သက်သာသွားပြီ။ နာရီဝက်လောက်ကြာတော့ သူနာပြုဆရာမလေးက သွေးစစ်ဖို့ လာအကြောင်းကြားပေးတယ်။ သွေးစစ်တဲ့အခန်းက ကျတော်အနားယူတဲ့ အခန်းနဲ့ နှစ်ခန်းကျော်သာခြားမယ်။ ဆရာထိန်လင်းက သွေးစစ်တဲ့ မိန်းကလေးနဲ့ ကျတော့်ကို အပြန်အလှန် မိတ်ဆက်ပေး၊ ပြီးတော့ သွေးဖောက်တယ်။ သွေးဖောက်ပြီးတာနဲ့ ဓာတ်မှန်နဲ့အီးစီဂျီရိုက်ကြတယ်။ သူတို့နိုင်ငံ full medical chekup တိုင်း မျက်စိပါဝါစစ်ရတယ်။ ကျတော်စစ်တဲ့ package ကpremier package ပါ။ CT scan တွေဘာတွေမပါတော့ အလယ်လတ်တန်းစားပဲဆိုပါတော့။ နောက်တော့ ဆီးနဲ့ ဝမ်းစစ်ဖို့ ဗူးကလေးနှစ်ဗူး ထုတ်ပေးတယ်။ ကျတော်က ဆီးစစ်ဖို့ တစ် ဗူးဘဲယူပြီး ဝမ်းစစ်ဖ်ု့ကို  ငြင်းခဲ့ပါတယ်။(ဆေးစစ်တဲ့ထဲမှာ ပါပေမယ့် ကိုယ်မစစ်ချင်တာတခုက်ု ငြင်းခွင့်ရှိပါတယ်) 

ဆီးစစ်ပြီးတာနဲ့ ဆေးစစ်ဆေးမှုက ပြီးပါပြီ။ ဘာဆက်လုပ်ရမဦးမလဲမေးတော့ ဆရာထိန်လင်းက ရယ်တယ်။"အကုန်ပြီးသွားပြီဆရာရဲ့။ ဆရာတို့ စားဖို့ပဲပဲကျန်တော့တယ်"ဆိုပြီး ဆေးစစ်တဲ့အခန်းနဲ့ သုံးခန်းကျော်ကို ခေါ်သွားတယ်။ ဒီအခန်းက ဆရာဝန်နဲ့ လူနာတွေကို အခမဲ့ ဘူဖေး ကျွေးတဲ့အခန်းပါ။ (ဘူဖေးက ကျတော်သိပ်မကြ်ုက်တဲ့စနစ်ထဲမှာပါတယ်) စားနေတဲ့ ဆရာဝန်အခ်ျု့လည်း တွေ့တယ်။ အနောက်တိုင်း ထုံးစံအတိုင်း ကိုယ့်ဘာသာယူပြီးစားရုံပဲ။ ကော်ဖီဖျော်စက်၊အအေးစက် အကုန်ချပေးထားတယ်။ ကက်ပချီနို, လက်တေး ကိုယ်ကြိုက်တာကို ခလုပ်နှိပ်ရုံပဲ။ ကျတော်ကတော့ ခါးလုိ့ မသောက်ဘူး။ 

လူနာတွေကြည့်ဖ်ို့ ကိုထိန်လင်းထွက်သွားတော့ ဒေါက်တာ ဇင်မာနိုင်နဲ့ စကားပြောရင်း ကျန်ခဲ့တယိ။ အဲဒီတော့မှစကားဆက်စပ်မိရင်း ကျတော်နဲ့ တနှစ်ထဲ အတူတူအောင်မှန်း သိရတော့တယ်။ ကျောင်းချင်းတော့မတူကြဘူး။သူက မကွေးဆင်း၊ ကျတော်က မန်းလေးကျောင်းထွက်၊ စကားပြောရင်း စင်္ကာပူမှာ အလုပ်တဲ့ဆရာဝန်တွေက်ု ချီးကျူးစရာ တခု ပေါ်လာတယ်။ ရောဂါအများစုကို တီးမိခေါက်မိ အကုန်လုံးလိုက်ပြောနိုင်တယ်။ ကျတော်က ရောဂါမျိုးစုံ ကုနေသူ၊ ဆေးပညာစိတ်ဝင်စားသူဖြစ်တဲ့အပြင် စာတွေလည်း ရေးတဲ့သူမို့ သိပ်မထူးဆန်းလှပါဘူး။ သူတို့က တချုိ့ရောဂါတွေ မကုပေမယ့် အများစုရောဂါတွေကို နှံ့နှံ့စပ်စပ် သိကြတာလည်း တကယ်အံ့အားသင့်စရာ။ဒါကလည်း အလုပ်ကသင်ပေးသွားတဲ့ စနစ်ကြောင့် ဖြစ်မယ်ထင်တယ်။ (သူတို့ဆီမှာ တလကိုဘယ်ရွေ့ဘယ်မျှ သင်တန်းတွေ တက်ရတယ်ဆိုတာ နောက်မှသိတယ်)

နာရီဝက်လောက် နေတော့ ဆရာထိန်လင်းပြန်ရောက်လာပါတယ်။(သူလည်း လူနာနဲ့ ကျတော်တို့ကြားမနားရရှာပါဘူး)။ စားပြီးတာနဲ့ နောက်ကောင်တာခေါ်သွားပြီး သွေးအဖြေယူရင် ပြရမယ့်စာရွက်ဖြတ်ပ်ိုင်းကို ပေးတယ်။ အဲဒီမှာပဲ ဆရာဝန်နဲ့ပြတာကအစ သွေးအဖြေရအောင် လုပ်ပေးဖို့ ပြောနေသံ ကြားလိုက်ရတယ်။ ဒါက မြန်မာဆရာဝန်တွေရှိတဲ့ ဆေးရုံတွေရဲ့ အားသာချက်ပါ။ ကိုယ့်လူမျိုးရှိတော့ အားကိုးရသလို အချိန်ကုန်သက်သာတယ်။ 

ဆေးစစ်တာပြီးတော့ ရက်ဖဲလ် ဆေးရုံ နေရာစုံ လိုက်ပြပါတယ်။ ဆေးရုံအခန်း လူနာစောင့်ရှောက်မှုတွေ အကုန်လုံးပဲ။ အသစ်တိုးချဲ့မဲ့ ဆေးရုံနေရာတွေထိ ရောက်ခဲ့တယ်။ လူနာတွေ အများအပြားထိုင်စောင့်နေပေမယ့် အားလုံးအေးအေးသက်သာပါပဲ။ ဒါပေမယ့် ဒီတခါတော့ ကျတော်သဘောပေါက်လိုက်ပါပြီ။ သူတို့ ဘာ့ကြောင့် ဆေးဆေးနေနိုင်လည်း ဆိုတာ။ 

အဲဒီအချိန်မှာပဲ သူတို့ထိုင်စောင့်နေတဲ့ပုံကို ဓာတ်ပုံရိုက်ဖို့ စိတ်ကူးပြီး ဖုန်းကိုင်တဲ့အချိန် အစ်ိမ်းဝတ်ဆရာမက လှမ်းတားပါတယ်။ ဒီနေရာမှာ ဓာတ်ပုံရိုက်ခွင့်မရှိပါဘူးတဲ့။ ဒါနဲ့ ကျတော်က ဘေးမှာပါလာတဲ့ ဆေးရုံတာဝန်ရ်ှတဲ့သူကိုဘာလို့လဲဆိုတဲ့ ပုံစံမျိူး လှမ်းကြည့်တော့ သူက ရယ်ရင်း ခပ်တိုးတိုးလေးပြောတယ်။

"ဒီနေရာက လူနာတွေရှိနေလ်ု့ ဓာတ်ပုံရိုက်လ်ု့မရတာဆရာ။ သူတို့ မျက်နှာပါသွားလို့ အခန့်မသင့်ရင် ဆေးရုံပါ တရားစွဲလို့ ရတယ်။ဒါ့ကြောင့် ရိုက်ခွင့်မပြုတာပါလို့"ရှင်းပြတယ်။ ကျတော်လည်း ရှက်ရှက်နဲ့ရယ်ရင်း "ဘုရားရေ..တော်သေးတာပေါ့နော်၊ ကျတော်တရားစွဲခံရဖို့ သီသီလေးလိုတော့တယ်ဗျ"လို့ လှမ်းနောက်မိတယ်။ (ကျတော်တို့ မြန်မာပြည် ဆေးရုံ၊ ဆေးခန်းတွေမှာလည်း ခွင့်ပြုချက်မရှိဘဲ ဓာတ်ပုံရိုက်လို့မရပါ၊ မိရင် တရားစွဲလို့ ရပါတယ်။)

ဆေးရုံတခုလုံးမှာ မြန်မာနိုင်ငံသား ဆရာဝန်တွေ နည်းပေမယ့် သူနာပြုဆရာမ ဦးရေကတော့ ထင်သလောက် မနည်းလှတာ တွေ့ရတယ်။ ဒီမှာက လုပ်ခလစာပိုများတယ်။ အခန်းတိုင်းမှာ နာ့စ်တွေနဲ့ ဆေးရုံဝန်ထမ်းတွေရှိပေမယ့်ဆရာဝန်က လိုအပ်မှလာကြည့်ပါတယ်။ လူနာနားမှာ အနီးကပ်ပြုစုရတာ နာ့စ်နဲ့ လူနာစောင့်ဖြစ်ပါတယ်။ လူနာစောင့်ကလည်း တယောက်တည်းသာ ခွင့်ပြုပါတယ်။ လိုအပ်ရင် ပေးထားတဲ့ ခလုတ်ကလေးနှိပ်၊ နာ့စ်ကရောက်လာမယ်။ အခြေနေကြည့်ပြီး လိုအပ်ရင် ဆရာဝန်ခေါ်မယ်။ ဒါပါပဲ။

ဆေးရုံကို လိုက်ကြည့်ပြီးတဲ့အခါ ရက်ဖဲလ် ဆေးရုံက အုပ်ချုပ်မှု ဒါရိုက်တာ မစ္စစ် ဆူလိယီ နဲ့ မိက်ဆက်ပေးတယ်။သူမက တရုတ်နွယ်ဖွား စင်္ကာပူးရီးယန်း အမျိုးသမီးတယောက်ပါ။ သူတို့ဆေးရုံတွေမှာ အများစုက အမျိုးသမီးဒါရိုက်တာတွေများတယ်။ ရောက်ရောက်ချင်း ဆရာထိန်လင်းက မိတ်ဆက်ပေးတယ်။

"သူက မြန်မာနိုင်ငံက နာမည်ကြီး ဆရာဝန် စာရေးဆရာတယောက်ပါ"

 မစ္စစ်ဆူ ကအံ့သြသွားတယ်။ 

"ဟင်..ငါကဆရာဝန်တယောက်လို့ပဲ သိထားတာ၊ မင်းအသက်ဘယ်လောက်ရှိပြီလဲတဲ့။ 

"၂၉ နှစ်ပါ" ဖြေတော့ သူက ရင်ဘတ်ကို လက်နဲ့ ဖိတယ်။

"ဘုရားရေ၊ ငါတို့မှာ ခေါင်းတခုတည်းနဲ့ အလုပ်နေတာတောင် အတော်ပင်ပန်းလှပြီထင်နေတာ၊မင်းက ဦးနှောက်ကော နှလုံးသားနဲ့ကော ပြိုင်တူအလုပ်လုပ်နေရတာပေါ့၊ လေးစားပါတယ်ကွာ"

ဒေါက်တာ ထိန်လင်းကလည်း ကိုယ့်လူမျိုးချင်း ထပ်ဝင်ပြောတယ်။

"သူက ကျန်းမာရေး ဆောင်းပါး (၆၀၀)ကျော်ရေးပြီး ဝတ္တု တအုပ်ထွက်ပြီးပြီမစ္စစ်ဆူရဲ့။ အခုသူ့စာအုပ်တောင် ရုပ်ရှင်ရိုက်ဖို့ ကမ်းလှမ်းနေရပြီ"

မစ္စစ်လူက ထိုင်ရာကထပြီး လှိုက်လှိုက်လှဲလှဲနဲ့ ဒုတိယအကြိမ် လက်ဆွဲနှုတ်ဆက်ပြန်တယ်။

"ကွန်ဂရက်ကျုလေးရှင်းကွာ၊ မင်းကိုတော့ တကယ်ချီးကျူးမိပါတယ်"

ကျတော်ကလည်း ကျေးဇူးတင်ပါကြောင်းပြန်ပြောပြီး ပြန်ထိုင်နေလိုက်တယ်။ နောက်တော့ သူက ဆေးရုံ လိုက်ကြည့်ရတာ အဆင်ပြေသလား၊ဘာညာ ဆက် မေးပါတယ်။ ကျတော်ကလည်း "အကုန်ကောင်းပါတယ်၊ကျတော်တို့ဆီကနဲ့ တခြားဆီပါလို့ အမှနိတိုင်းဖြေခဲ့ပါတယ်။  သူက စိတ်မကောင်းစွာနဲ့ "မင်းတို့ဆီက ဆရာဝန်တွေလည်း တော်ကြပါတယ်။ စက်ပစ္စည်းကောင်းတွေ မရှိတော့လည်း ဘာတတ်နိုင်မှာလဲ"လို့ ညည်းတယ်။ 

အဲဒီမှာပဲ ဘေးမှာထိုင်နေတဲ့ စီနီယာ အိတ်ဇက်ကတစ် လိုဟိန်လောင်းက ဝင်ပြောပါတယ်။မစ္စစ်လိုက မလေးရှားနွယ်ဖွား စင်္ကာပူသူပါ။

"ဒါနဲ့ မြန်မာလူမျိုးတွေက ဘန်ကောက်ကို တော်တော်သွားပြကြတယ်နော်"တဲ့။

"ဟုတ်တယ်။ မြန်မာနဲ့ ထိုင်းက ယဉ်ကျေးမှုနီးစပ်တယ်။ နောက်ပြီး မြန်မာနိုင်ငံက လူလတ်တန်းစားပိုများပြီး ဈေးကလည်း စင်္ကာပူထက်ပိုချိုတယ်၊ဒါ့ကြောင့် သွားကြတာပါ၊ နောက်တချက်က ဘန်ကောက်ဆေးရုံတွေက ရုံးခွဲတွေဖွင့်ပြီး ဈေးကွက်ဆွဲဆောင်တာလည်း ပါလိမ့်မယ်ထင်တယ်"လို့ ပြန်ဖြေခဲ့တယ်။

"အခု နှစ်နိုင်ငံလုံး ဗီဇာမလိုတော့ဘူးမလား"

"အင်း မလိုတော့ဘူးလေ"

မစ္စစ်ဆူက "ဟုတ်လား၊ မသိလ်ုက်ဘူး၊ ဘယ်တုန်းကလဲ"လို့ ဝင်မေးတယ်။ ဒေါက်တာ ထိန်လင်းက "၂၀၁၆ ဒီဇင်ဘာလကတည်းက"လို့ ဝင်ဖြေတော့ သူ့နဖူးသူရိုက်ရင်း "ငါတော်တော်ခေတ်နောက်ကျနေတာပဲ"လို့ ရယ်ပြီးပြောတယ်။ နောက်မှ ကျတော့်ဖက်ပြန်လှည့်ပြီး ရင်းရင်းနှီးနှီးပြောတယ်။

"ငါတို့က မြန်မာလူမျိုးတွေကို သဘောကျပါတယ်။ သူတို့က တော်တော်ဖော်ရွေတယ်၊ မြန်မာပြည် ငါမရောက်ဖူးဘူးနော်၊ မစ္စတာ ထိန်လင်းတို့ကိုကြည့်ပြီးပြောတာ၊ သူတို့က ပေါင်းလ်ု့ကောင်းတယ်၊အလုပ်ကြ်ုးစားတယ်။ ဆေးရုံမှာလည်း မြန်မာ သူနာပြုတွေကြည့်ရင် အားလုံးက ရင်းရင်းနှီးနှီးရှိတယ်၊ ဒါပေမယ့် မင်းပြောသလို တို့ဆီကဈေးကြီးတယ်၊ ဒါ့ကြောင့် ဘန်ကောက်သွားတာပေါ့၊ ဘာပဲပြောပြော သူတို့ကျန်းမာရေးအဆင့်တန်းကလည်း မဆိုးလှပါဘူး"

ကျတော်က တချက် ပြုံးရင်း သူ့ကိုပြန်ထောက်တယ်။

"မစ္စစ်ဆူတို့ သတိမထားမိလို့ပါ၊ ဒီမှာ အားသာချက်နှစ်ခု ရှိနေတာပဲ"

"ဟင်..ဟုတ်လား"

"နံပါတ်တစ်- ဒီမှာ ဒေါက်တာထိန်လင်းတို့လို့ မြန်မာဆရာဝန်တွေရှိတယ်။ သူတို့က ကောင်းကောင်း ကူညီပေးနိုင်တယ်။ သွားရေးလာရေးအတွက်ဆိုလည်း စိတ်ပူစရာမရ်ှလှပါဘူး။ ဒေါက်တာ ဇင်မာနိုင်တို့ ulink လို  ကုမ္ပဏီတွေ ရှိနေတာပဲ။ လေယာဉ်လက်မှတ်၊ နေရေးထိုင်ရေး သူတို့စီစဉ်ခိုင်းရုံပဲ။ လိုအပ်ရင် အကြံတောင် ပေးနိုင်လိမ့်မယ်။ ပိုကောင်းတဲ့အချက်က အနီးကပ်စောင့်ရှောက်ပေးမယ့် နာ့စ်ဆရာမတွေက မြန်မာလူမျိုးတွေဖြစ်နေတာပါ။ ဘန်ကောက်ဆေးရုံတွေက မြန်မာစကားပြန်တွေ ခန့်ထားပေမယ့် လက်တွေ့ကျကျ ဆက်ဆံတဲ့အခါ ထိုင်းလူမျိုးတွေနဲ့သာဆက်ဆံရလို့ အခက်အခဲရှိနိုင်တယ်။ နောက်ထပ်အားသာချက်က  စင်္ကာပူဟာ အရှေ့တောင်အာရှရဲ့ အကောင်းဆုံးဆိုတဲ့ ဆေးရုံနဲ့ ကျန်းမာရေးအဆင့်အတန်း ပိုင်ဆိုင်ထားလို့ပါ၊ ကံကောင်းချင်တော့ မြန်မာပြည်က တံခါးဖွင့်ဝါဒကျင့်သုံးလို့ စီးပွားရေးတက်လာနိုင်စရာအကြောင်းရှိပါတယိ။ လူတွေရဲ့ အမြင်ကျယ်လာတာနဲ့အမျှ နောက်ပိုင်းမှာ တတ်နိုင်တဲ့သူတွေဟာ ဘန်ကောက်ကို မရွေးဘဲ စင်္ကာပူကို ရွေးလာနိုင်စရာရှိတယ်၊ ဘာပဲပြောပြော မြန်မာနာ့စ်တွေလည်း ကိုယ့်လူမျိုးချင်းပြုစုဖို့  ပိုနှစ်ခြိုက်ကြမယ် ထင်ပါတယ်၊ ဒါလူ့သဘာဝပဲလေ"

"ဒုတိယပိုင်းကို  ဆက်ရန်"

ဒေါက်တာ အေးမင်းထူး

၁၄.၁.၁၇