Osteoarthritis အရိုးအဆစ်ရောင်ခြင်း

ပုံမှန်လူတယောက်မှာ သိသာထင်ရှားတဲ့အရိုးပေါင်း ၂၀၆ခု ရှိပါတယ်။ သက်ရှိတွေရဲ့ရပ်တည်မှုမှာ အရိုးရဲ့ အခန်းကဏ္ဍက အရေးပါတယ်။ဒီအရိုးတွေကပဲ ခန္ဓာကိုယ်တခုလုံးကို ထောက်ပံ့ပေးထားတယ်။ အရိုးချင်း တွယ်ဆက်တဲ့နေရာကို အဆစ်လို့ခေါ်ပါတယ်။လူ့ခန္ဓာကိုယ်မှာ အဆစ်စုစုပေါင်း ၃၆၀ခန့် ရှိပါတယ်။အဆစ်သဘောက လှုပ်ရှားမှုကို အဓိကဖြစ်စေတယ်။ နေ့စဉ်လှုပ်ရှားနေရတဲ့  အရိုးအဆစ်တွေရဲ့ လုပ်ဆောင်မှုကို လျှော့မတွက်သင့်ဘူး။လှုပ်ရှားမှုများတာလာနဲ့အညီ ပျက်ဆီးမှုလည်း များလာတာ သဘာဝပါ။ ဒါ့ကြောင့်ပဲ အသက်အရွယ်မရွေး အရိုးအဆစ်ရောဂါတွေ အတွေ့များလာတယ်။လက်ရှိချိန်ထိ အဆစ်ရောင်ရောဂါတွေထဲမှာ  အဖြစ်များဆုံးက Osteoarthritis ခေါ်တဲ့  အဆစ်ရောင် ရောဂါ ဖြစ်ပါတယ်။ အခေါ်အဝေါ်အရ  အရိုးအဆစ်ရောင်ခြင်း (osteoarthritis)ဆိုပေမယ့် အဆစ်ရောင်ရမ်းရုံမက ကြာလာတဲ့အခါ ပျက်ဆီးတဲ့ အခြေအနေမျိုး ဖြစ်လာတယ်။အချိန် ကြာလေ အဆစ်ပျက်ဆီးမှု ပိုဆိုးလေဖြစ်လို့ degenerative joint diseaseလို့ ခေါ်ပါတယ်။ တစ်ကမ္ဘာလုံးမှာ လူပေါင်း သန်း၂၅၀ လောက်ဟာ osteoarthritis ခေါ်တဲ့အရိုးအဆစ်ရောင်ရမ်းပျက်ဆီးတဲ့ ဝေဒနာ ခံစားကြရပါတယ်။

ဘာ့ကြောင့်ဖြစ်လဲ။

-အဆစ်တွေတဖြည်းဖြည်း အိုမင်းယိုယွင်းလာလို့၊

-အဆစ်ထိခိုက်ဒဏ်ရာရလို့၊

-သွားလာ လှုပ်ရှားမှုများလို့၊

-အဝလွန်ပြီး အဆစ်ဖိအားများလို့၊

osteoarthritisဖြစ်ပေါ်လာတဲ့ အဓိကအကြောင်းရင်းက အရိုးနုတွေ ပျက်ဆီးလာလို့ပါ။ ခန္ဓာကိုယ်ဖွဲ့စည်းပုံအရ အပေါ်ပိုင်း ဝိတ်များတဲ့အခါ အောက်ပိုင်းမှာ ဖိအားပိုများလာတယ်။ ဒီလိုသက်ရောက်မှုက အရိုးထိပ်မှာ ကာကွယ်ပေးတဲ့အရိုးနုတွေကို ပျက်ဆီးစေတယ်။ တဖြည်းဖြည်းနဲ့ လုံးပါးပါးပြီး အရိုးချင်းထိခိုက်မိကြတယ်။ ထိခိုက်မှုသဘောကြောင့် ရောင်ရမ်းမှု စတင်လာတယ်။ နာကျင်မှုကိုပါ ခံစားလာရတယ်။ ထိခိုက်မိတဲ့အရိုးနေရာမှာ  အစားထိုး အရိုးဆဲလ်သစ်(osteophyte)တွေဖြစ်လာတယ်။အတက်တွေထွက်လာတာကြောင့် အဆစ်တွေ ပုံမမှန်ဖြစ်လာတယ်။ ဖြစ်တာကြာလာတာနဲ့အမျှ ပုံမှန်လှုပ်ရှားသွားလာမှုကိုပါ ထိခိုက်လာတယ်။ အကြောတင်းတာ၊အဆစ်နာတာတွေက ဖြည်းဖြည်းချင်း ပိုဆိုးလာတယ်။ ပွတ်တိုက်မှုများတဲ့အခါ ပြုပြင်မှုတွေ မလုံလောက်တော့ဘူး။ အစားထိုးပြုပြင်တဲ့ဖြစ်စဉ် အလျဉ်မမှီတော့ဘဲ ပျက်ဆီးမှုသာ ဆက်လက် ဖြစ်လာတော့တယ်။ ကြာလာတဲ့အခါ ပုံမှန်လှုပ်ရှားနိုင်စွမ်း မရှိတော့ဘဲ မသန်မစွမ်းဖြစ်လာတယ်။ ကွေးမရ၊ဆန့်မရတဲ့အခါ နောက်ဆုံးအဆင့် အဆစ်အစားထိုးကုရတာမျိုးထိ ရှိလာတတ်တယ်။ 

ဘယ်လိုလူတွေက အဖြစ်များကြလဲ။

အမျိုးသမီးတွေမှာ အမျိုးသားတွေထက် ပိုတွေ့ရတယ်။ အဆစ်မှာ ထိခိုက်ဒဏ်ရာဖြစ်ဖူးသူတွေဟာ osteoarthritis ပိုဖြစ်နိုင်တယ်။ အဝလွန်ခြင်းက osteoarthritisဖြစ်စေတဲ့ အဓိကအကြောင်းအရာမျိုး ဖြစ်ပါတယ်။ မျိုးရိုးနဲ့လည်း သက်ဆိုင်တတ်တယ်။ အသက်၅၀ကျော် အရွယ်လူကြီးတွေမှာ အဖြစ်များလို့ လူကြီးရောဂါလို့ သတ်မှတ်ကြပါတယ်။ အသက် ၆၀ကျော်လာတဲ့အခါ ၈၀ရာခိုင်နှုန်းခန့်ဟာ အရိုးအဆစ်ရောင် သဘောမျိုး ပိုတွေ့လာရတယ်။ အလုပ်အကိုင်၊ အနေအထိုင်လည်း ဖြစ်စေတဲ့အကြောင်းထဲမှာ ပါဝင်ပါတယ်။ အဆစ်တွေအလုပ်များရင် အသက်ကြီးလာတဲ့အခါ osteoarthritis ပိုဖြစ်နိုင်တယ်။ မွေးရာပါ အရိုးနုပျက်ဆီးတဲ့ ရောဂါသည်တွေမှာ အရွယ်မတိုင်ခင်လည်း ဖြစ်နိုင်တယ်။သမိုင်းအထောက်အထားတွေအရ လူတွေတင်မက ဒိုင်နိုဆောတွေမှာလည်း အရိုးအဆစ်ရောင် ပျက်ဆီးတဲ့သဘောမျိုးကို လေ့လာတွေ့ရှိခဲ့ရတယ်။ 

ဘယ်နေရာတွေမှာ အဖြစ်များလဲ

Osteoarthritis လိုအဆစ်ရောင်ရောဂါမျိုးဟာ နေရာမရွေးဖြစ်နိုင်တယ်။ ၈၀ရာခိုင်နှုန်းဟာ ခန္ဓာကိုယ်ရဲ့ ဖိအားဒဏ် အခံရဆုံးဖြစ်တဲ့ ဒူးဆစ်၊ပေါင်ဆစ် စတဲ့နေရာတွေဖြစ်ကြတယ်။ အဖြစ်များဆုံးနေရာက ဒူးဆစ်ဖြစ်ပါတယ်။ နှစ်ဖက်လုံးမှာ ပြိုင်တူဖြစ်ကြတယ်။ ပေါင်ခြံဆစ်(hip joint)မှာဖြစ်ရင် ပေါင်ရဲ့အရှေ့ခြမ်းနဲ့ ဘေးခြမ်းမှာ တင်းပြီးနာနိုင်တယ်။ နာကျင်မှုကို ပေါင်ခြံထဲကတဆင့် ခံစားရတယ်။ လည်ပင်း၊ခြေ၊လက်၊ကျောရိုးဆစ်စတဲ့ နေရာတွေမှာလည်း ဖြစ်နိုင်တယ်။ မနက်အိပ်ယာထ ဖြစ်တဲ့အဆစ်မှာ တင်းနေတတ်တယ်။ တင်းပြီးနောက်ပိုင်းမှာ လှုပ်ရှားမှုနဲ့အတူ အဆစ်က ကိုက်လာတယ်။ လှုပ်ရှားမှုမရှိတဲ့အခါ သက်သာပြန်တယ်။ရောဂါပိုရင့်လာတဲ့အခါ ထိုင်နေရင်းနဲ့ကို နာနေတတ်တယ်။နာကျင်မှုနဲ့ ရောင်ရမ်းမှုက အဆစ်တွေရဲ့ လှုပ်ရှားနိုင်စွမ်းကို ကန့်သတ်ပေးတယ်။ လှုပ်ရှားတဲ့အခါ အသံမြည်လာတတ်တယ်။ လှုပ်ရှားမှုနည်းတဲ့အခါ အဆစ်ကို ထောက်ပံ့ပေးတဲ့ ကြွက်သားတွေ အားနည်းလာတယ်။ အလားတူ လှုပ်ရှားမှုမရှိတဲ့ ခန္ဓာကိုယ်မှာ အဆီတက်လာပြန်တယ်။ တဖြည်းဖြည်းဝလာတာကြောငိ့ အဆစ်ပေါ်ဖိအားပိုများလာသလို အခြေအနေပိုဆိုးလာတယ်။ ကြာလာရင် အဆစ်နေရာမှာ ပုံပျက်ပန်းပျက် ဖြစ်လာတယ်။ နောက်ပိုင်းမှာ ရောဂါလက္ခဏာဟာ သက်သာမလာဘဲ ပိုဆိုးလာတော့တယ်။ 

ဘယ်လိုသိရှိနိုင်လဲ။

အသက်အရွယ်၊ ရောဂါလက္ခဏာ၊အဆစ်အနေအထား ၊စမ်းသပ်စစ်ဆေးမှုတွေက သိရှိနိုင်တယ်။ ဓာတ်မှန်ရိုက်ကြည့်ရင် အဆစ်နေရာကျဉ်းတာ၊အရိုးမျက်နှာပြင် ထူတာ၊ပုံမမှန်တာမျိုး တွေ့ရတတ်တယ်။ လိုအပ်ရင် တခြားစစ်ဆေးမှုတွေ(သွေး၊ဆီး၊ဓာတ်မှန်အကြီးစား)ရိုက်တာလုပ်ရနိုင်တယ်။ 

Osteoarthritis ဖြစ်လာခဲ့ရင် 

စိတ်အားမငယ်အောင် အားပေးသင့်တယ်။အားပေးရုံတင်မက လေ့ကျင့်ခန်းလုပ်နိုင်ဖို့ ကူညီပေးရတယ်။ အဝလွန်သူဖြစ်တဲ့ တက်နေတဲ့ဝိတ်ကို အရင်ချပေးရတယ်။ ကြွကိသားတွေ သန်မာစေဖို့ အကြောလျှော့လေ့ကျင့်ခန်း နေ့စဉ်လုပ်ပေးသင့်တယ်။အရိုးအဆစ်မှာ ဖိအားကင်းကင်းနဲ့ လှုပ်ရှားတဲ့ လေ့ကျင့်ခန်းဖြစ်ဖို့ လိုအပ်ပါတယ်။ အသင့်တော်ဆုံးလေ့ကျင့်ခန်းက ရေကူးတာ၊  စက်ဘီးစီးတာမျိုး ဖြစ်ပါတယ်။ နာကျင်မှုသက်သာစေဖို့ အကိုက်အခဲပျောက်ဆေး တမျိုးမျိုးနဲ့ ထည့်သောက်ပေးရတယ်။သောက်ဆေးတင်မက လိမ်းဆေးပေးဖို့ ညွှန်းလာကြတယ်။  ဒူးခေါင်းနဲ့ လက်ချောင်းတွေမှာ ဖြစ်ရင် လိမ်းဆေးက ပိုမိုသင့်တော်တာ တွေ့ရတယ်။capsaicin၊salicylate ၊menthol ပါတဲ့အပူဓာတ်လိမ်းဆေးမျိုး လိမ်းပေးနိုင်တယ်။ အပူဆေးတွေမခံနိုင်ရင် အအေးဓာတ်လိမ်းဆေးတွေ လိုအပ်သလို သုံးစွဲနိုင်တယ်။ ဒီဖက်ခေတ်တွေမှာ အသုံးများတဲ့ဆေးတမျိုးက glucosamine နဲ့ chondroitin ပါတဲ့ အရိုးနု၊အဆစ်အားဖြည့်ဆေးမျိုး ဖြစ်ပါတယ်။ငါးကြေးခွံကထုတ်တာကြောင့် အရိုးနုသစ်ဖြစ်ပေါ်စေတယ်။ အဆစ်ရည်ကို အားဖြည့်ပေးတယ်။လေ့လာမှုတွေအရ လူနာတွေရဲ့ သုံးပုံတစ်ပုံမှာ အကျိုးရှိတာတွေ့ရတယ်။  ဆေးပေးပြီး ၆လကျော်ထိ ထူးခြားမှုမရှိရင် ပြန်ဖြတ်နိုင်တယ်။ နောက်ပိုင်းမှာ အဆစ်အားဖြည့်လိမ်းဆေးတွေပါ ထုတ်လာကြတယ်။ လိမ်းဆေး၊သောက်ဆေး မသက်သာသေးရင် အရောင်ကျအောင် အဆစ်ထဲ စတီးရွိုက်ဆေးထိုးထည့် နိုင်တယ်။တနှစ်ကို လေးကြိမ်ထက် ပိုမထိုးသင့်ဘူး။ အဆစ်ရည်အားဖြည့်ဖို့အတွက် hyaluronic acidကို အဆစ်ထဲထိုးထည့်ပေးနိုင်တယ်။ အထူးသဖြင့် ဒူးဆစ်၊ပေါင်ဆစ် အားဖြည့်ချင်တဲ့အခါမှာ အသုံးပြုကြတယ်။ နောက်ဆုံးမသက်သာရင် အဆစ်အစားထိုးကုသမှုမျိုး လုပ်နိုင်ပါတယ်။ ကုန်ကျစရိတ်ကြီးသလို ကျွမ်းကျင်မှုလည်း လိုအပ်ပါတယ်။ လေ့လာမှုတွေအရ အမေရိကားမှာ အဆစ်အစားထိုးကုသမှုအများစုဟာ osteoarthritis ရောဂါကြောင့် ဖြစ်ပါတယ်။

ကာကွယ်ခြင်း

-ကိုယ်အလေးချိန်တတ်နိုင်သမျှ လျှော့ချပါ။

-အစားအသောက် သင့်တင့်မျှတရုံသာ စားပေးပါ။

-လေ့ကျင့်ခန်း ပုံမှန်လုပ်ပေးသင့်တယ်။

-အဆစ်ပေါ်မှာ ဖိအားကင်းတဲ့ လေ့ကျင့်ခန်း ဖြစ်ဖို့လည်း လိုအပ်ပါတယ်။

-လေ့ကျင့်ခန်းလုပ်စဉ် ခြေစွပ်၊ဒူးစွပ် ဝတ်ဆင်ပါ။

-လေ့ကျင့်ခန်းပြင်းပြင်းထန်ထန် လုပ်တာမျိုး ရှောင်ကြဉ်သင့်တယ်။

-ခပ်ပျော့ပျော့၊ဝိတ်ထိန်းနိုင်တဲ့ ဖိနပ်မျိုးစီးပေးပါ။

-အဆစ်နေရာကို ထိခိုက်ဒဏ်ရာမရအောင် ဂရုစိုက်ပါ။

-မိဘမျိုးရိုးရှိရင် သတိပိုထားသင့်တယ်။

-သွေးဆုံးပြီးအမျိုးသမီးတွေ အဆစ်အားဖြည့်ဆေး ကြိုသောက်ထားသင့်တယ်။

-ဒီလိုအဆစ်ရောဂါမျိုးမှာ ကာကွယ်ခြင်းကို ပိုမိုအလေးထားလုပ်ဆောင်သင့်ပါတယ်။

ဒေါက်တာအေးမင်းထူး

Health Care Journal(19.7.13)